Членовите на здружението на стечајни работници „Унит“ од Куманово, денеска го поздравија усвојувањето Законот за материјално обезбедување невработени лица поради приватизација на претпријатијата со доминантна сопственост на државата, предложен од група пратеници, со кој се очекува да бидат опфатени дополнителни 1.600 стечајци на ниво на државата.
Координаторката на здружението, Лилјана Георгиевска изјави дека со овој предлог се отстранува условот за лица кои по стекнување на право за материјален надомест биле вработени на неопределено време, а работниот однос им престанал или по нивна или одлука на работодавецот.
– Многу значи ова новина, бидејќи ќе бидат опфатени и стечајците кои, не поради нивна вина или волја, ги напуштаа фирмите, како примерот со Монопол кога поради здравствено осигурување, работниците мораа да ја напуштат работата. Сега со овој предлог ќе бидат опфатени и оваа категорија стечајци, изјави Георгиевска.
Таа истакна дека во Куманово, пред усвојување на овој закон спорни биле стечајците кои доаѓаат од фирмите „Житомел“, „Монопол“, „ЗИК сточарство и преработка“, „Кожара“ и „Чик“.
Досега, потсети Георгиевска, опфатени се околу 6.400, сега со новите измени се очекува да бидат опфатени дополнителни 1.600 или вкупно околу 8000 стечајци. Таа изрази надеж дека со ребалансот на буџетот ќе бидат одвоени средства и за материјално згрижување на стечајците кои доаѓаат од фирми на кои им е сменет матичниот број.
– Ќе продолжиме да се бориме се додека не биде опфатен и последниот стечаец. Пресреќни сме, што има одредена сума со кои стечајците ќе можат достоинствено да ги поминуваат месеците се до пензионирањето, додаде Георигиевска, и им се заблагодари на координаторите на здружението низ градовите од Македонија.
Стечајците ќе имаат можност да аплицираат до 31 декември годинава, а ќе добиваат 8.953 денари месечно. (МИА)
