Министрите за надворешни работи на НАТО на пладне ја започнаа првата седница од дводневниот состанок во Брисел. Ова е првата физичка средба на министрите за надворешни работи на НАТО од почетокот на пандемијата.
На состанокот учествува македонскиот министер за надворешни работи, Бујар Османи, кој изутринава порача дека Северна Македонија стои рамо до рамо со нејзините сојузници во Алијансата и ги споделува вредностите на организацијата.
Во Брисел е присутен и новиот американски државен секретар, Ентони Блинкен, за кого ова е прва средба во седиштето на НАТО на оваа функција.
На дневен ред на министрите денеска се подготовките на претстојниот самит на НАТО кој ќе се одржи подоцна оваа година, како и иднината и перспективите на Алијансата за 2030 година, како да се адаптира овој сојуз на новите безбедносни предизвици.
Голем дел од разговорот ќе биде посветен на Русија, која според НАТО сојузниците станува сѐ по проблематичен партнер поради сѐ поагресивното однесување.
Присуството на американскиот државен секретар ќе биде прилика за НАТО да нагласи повторно дека е важно да се зајакнат трансатлантските односи.
-Дојдов тука да ја изразам цврстата посветеност на САД за Алијансата, која е темел на мир, просперитет и стабилност за трансатлантската заедници повеќе од 70 години. И дојдов во Брисел затоа што САД сака повторно да ги изгради партнерствата, пред сѐ со своите НАТО сојузници, сакаме да ја ревитализираме Алијансата и да ја направиме силна и ефикасна против денешните закани како што била и во минатото, изјави Блинкен утрово на прес конференција со генералниот секретар на НАТО, Јенс Столтенберг.
-Имате декади искуство во надворешната политика и националната безбедност. И знам дека имате силна лична посветеност на НАТО, на трансатлантската врска. Поради тоа навистина ја ценам оваа прилика да Ве поздравам на Вашата прва посета на Европа, во седиштето на НАТО, му порача Столтенберг на Блинкен.
Столтенберг говореше за глобалните предизвици, со кои се соочуваат земјите-членки во моментов, набројувајќи ги руските дестабилизирачки активности, заканата од тероризам, кибер нападите и нуклеарната пролиферација, разурнувачките технологии, подемот на Кина и влијанието на глобалното затоплување и климатските промени врз безбедноста.
-Ниту една земја, ниту еден континент не можат да се соочат со овие предизвици сами. Ниту Европа може сама, ниту Америка може сама. Но Европа и Америка можат заедно во НАТО. И нашиот состанок денеска ќе биде можност да укажеме како ја зајакнуваме оваа врска додека се подготвуваме за Самитот во Брисел подоцна во текот на оваа година, рече Столтенберг.
Министрите ќе разговараат и за Блискиот Исток и Северна Африка, како и состојбата во Авганистан.
