Недостиг на елементарни услови во затворските ќелии, недостиг на лекари и друг медицински кадар, недоволна количина на храна и употреба на тортура дури и кон малолетните, констатирале собраниската комисија за надзор на казнено поправните установи и Народниот Правобранител.
Дел од забелешките ги прифатија и од Дирекцијата за Извршување санкции, за дел вината ја префрлија на менаџментот на затворите а за многу недостацоци најавија инвестиции и поголем ангажман.
“Работната група и раководниот тим на затворот заеднички ја потенцираа потребата за почитување на мегународните стандарди за човековите права, потребата од дополнување, унапредување на условите во затворот, како и потребата за зголемена заложба за поддршка за градење на капацитети на институцијата, зголемување на буџетот за управување на затворот и хуманиот третман на затворениците, зголемување и обука на човековите ресурси, јакнење на мерките за ресоциализација, мерки за едукација и рехабилитација од страна на националните институции итн”, изјави пратеник Фадил Зендели кој заседаваше со јавната дискусија за надзорот на условите во затворите низ земјата, а кој беше и дел од комисијата која извршила надзор на 3 затвори.
Во Идризово Зендели посочи дека забележале и недостиг на храна а и таа што била била со недоволен квалитет. Од Дирекцијата за извршување на санкции најавија инвестиции и подобри услови како материјални така и во однос на едукативните и образовни програми за рехабилитација на затворениците.
“Дека квалатитетот и количеството на храна за осудените лица е назадоволително, тоа е осмата констатација во извештајот, за која можеме делумно да се согласиме и тоа само од аспект на количеството кое не секогаш ги задоволува потребите на осудените лица. Но од аспект на квалитетит на храната истиот е гарантиран со постапките на јавна набавка на продуктите, а остатокот зависи од умешноста на готвачот и залагањето на менаџерот на затворот квалитетот да биде подигнат на повисоко ниво”, изјави Билјана Зефиќ, директорка на Дирекцијата за извршување санкции.
Од Народниот Правобранител како најголем проблем го посочија недостигот на најбараните лекари. За осудените жени во ниту еден затвор нема вработен гинеколог, а иако притворените и затворените најмногу се жалат на болки од заби, исто така нема ниту еден стоматолог. Од оваа институција потенцираа дека во нашите затвори сеуште се тепаат деца со гумени палки и тоа било потврдено и од лекарски тимови и форензичари.
“Жените немаат редовен пристап до гинеколог, а всушност гинеколог нема во ниту една казнено поправна установа. Стоматолошките услуги претежно се вршат во клиники затоа што нема вработен ниту стоматолог. Како на пример во Идризово и таа една стоматолошка столица која што постои не е функционална, а иронијата да биде поголема најголем број од поплаките на осудените лица се однесуват токму на проблеми со забите. Во разговор со едно од децата, само како пример, малолетник што издржува казна затвор, тимот доби информации дека бил удрен со гумена палка. При извршениот преглед на телото беше констатирана видлива повреда на која и надворешниот соработник кој беше во придружба на форензичарот даде првична оценка дека повредата навистина потекнува од таков удар”, изјави Васка Бајрамовска Мустафа на собраниската јавна надзорна дискусија.
Арбен Зеќири
