Денеска завршува новогодишната кошничка која траеше еден месец и беше формирана на иницијатива на бизнис секторот. Вклучуваше над илјада производи, а надлежните очекуваа поевтинување на основните прехранбени производи за најмалку 10 проценти.
Бидејќи беше на иницијатива на бизнис секторот, немаше владина одлука, а Државниот пазарен инспекторат можеше да врши само мониторингот на цените во согласност со Законот за заштита на потрошувачи и Законот за трговија, односно се гледаа цените на производите кои се во Новогодишната кошница и најниските цени на истите производи кои биле во последните 30 дена.
На самиот старт на новогодишната кошничка имаше реакции од јавноста дека за сметка на одредени прехранбени производи коишто се намалени, значително поскапеле други производи кои не беа дел од кошничката.
Надлежното Министерство за економија и труд апелираше до трговците да се придржуваат до договореното, најавувајќи дека доколку тоа не се случи, ќе се активира одлука за замрзнување на цените или ограничување на маржите.
Од друга страна, Државниот завод за статистика обајви дека инфлацијата во декември лани е за 4,4 проценти повисока од истиот период во 2023 година и дека најголем скок има кај храната.
Заменик-министерот за економија и труд, Марјан Ристески, за ТВ Сител истакна дека „Новогодишната кошничка“ имала ефект. Тој најави дека на денешниот состанокот закажан во Стопанската комора ќе ги сумираат резултатите од „Новогодишната кошничка“ и ќе ги договараат следните мерки.
Ристески потенцира дека доколку се види нагло покачување на цените на основните прехранбени производи, тогаш ќе бидат приморани да ги замрзнат цените.
Д.М.
