Вчера починатите четиримесечно бебе и новороденче на Детската клиника ја покачија црната статистика на седум починати бебиња и деца во Македонија, во изминатите десетина дена! Претходно, на Клиниката за гинекологија починаа три новороденчиња, а во Струга и Охрид, седуммесечно бебе и двегодишно дете… Само во второто тримесечје на 2017 година, починале 54 бебиња на возраст до една година…
Четиримесечното бебе и новороденчето кои вчера починаа на Детската клиника во Скопје биле со вродени здравствени проблеми, едното на Детската клиника се лекувало од раѓање, а другото починало откако било префрлено од Гинекологија на Детската клиника.
Според извештајот од Клиниката, четиримесечното бебе било од ризична бременост, родено во 41. гестациска недела, имало тешка вродена аномалија која предизвикувала проблеми со срцето и белите дробови, поради што било лекувано во гевгелиската болница, а потоа е хоспитализирано на Клиниката во Скопје. Поради влошување на општата состојба со продлабочување на прекините на дишењето и на срцевата акција, детето било реанимирано, интубирано и поставено на респиратор, но по влошување на состојбата и неколкукратните обиди за реанимација, детето сепак, починало.
За двегодишното девојче од Охрид се чекаат резултати од обдукцијата, според кои ќе се утврди дали имало лекарска грешка или не, а за седуммесечното бебе од Струга, министерот Арбен Тарвари ја отфрли лекарска одговорност. За смртта на трите бебиња на Гинекологија, исто така, се чекаат официјалните извештаи од комисиите коишто Министерството за здравство ги формираше за испитување на смртните случаи.
Министерот за здравство, Арбен Таравари, кој наследи хаотична ситуација во јавното здравство, изјави дека нема магично стапче, но дека борбата за намалување на смртноста на децата ќе биде негов приоритет.
„Најпоразително од сè, битка која, за жал, неуспешно била водена во изминативе 25 години – битката за нашите новороденчиња. Јас, како и никој друг, немам магично стапче. Загрижувачката бројка на смртност кај новороденчињата и мене ме погодува, не само како министер, туку и како човек и како родител. Не, јас немам магично стапче. Но, имам волја… Имам упорност. Имам решителност и најважно од сè, сигурност дека Македонија треба, мора и ќе има подобро здравство! Сè додека седам на ова столче, ветувам дека мој приоритет ќе бидат децата, бидејќи тие се наша иднина, наша светлина и наша гордост. И оваа битка ќе ја водиме за нив. Бидејќи тоа тие го заслужуваат од нас“, соопшти Тараври.
Но, опозициската партија ВМРО-ДПМНЕ, поднесе интерпелација за министерот Таравари, бидејќи како што велат: „Во Македонија веќе не смее да умираат луѓе поради хаосот кој го создава неспособниот Таравари“.
Во 2016 година починале 261 новороденче, односно 67 повеќе од 2015 година! Или 35% повеќе починати бебиња од 2015! И во 2012/13/14, бројот на починати бебиња се движел од 229, преку 235, до 232, и покрај тоа, што преку превентивните програми на Министерството за здравство, се одвојуваа средства за да се заштити здравјето на бебињата и на родилките.
Во првата половина од годината починале 121 бебе, објави Државниот завод за статистика. Според последните податоци од ДЗС за природното движење на населението, само во второто тромесечие од оваа година починале 54 бебиња на возраст до една година.
Покрај сите стратегии и платформи, според дел од „белите мантили“, катастрофалната состојба во македонското здравство е последица на поставување на неадекватен партизиран кадар на функции, од министерската, преку директорските функции, до најниско рангираните места, како и на егзодусот од невидени размери на квалитетен медицински персонал!
Наведувајќи дел од причините за катастрофалните состојби во јавното здравство, педијаторот д-р Ангелчо Андоновски, во разговорот за ЦИВИЛ Медиа, воден на 16 март годинава, беше дециден:
„Смртноста на новороденчињата и на доенчињата, како и останатите неразјаснети случаеви во здравството, се дело на несоодветните реформи, спроведени од несоодветен човек и од неговите послушници кои раководат и го менаџираат здравството во Република Македонија“.
Дехран Муратов
