Членството на Северна Македонија во НАТО е многу силен сигнал дека вратата на Алијансата е навистина отворена и дека не се работи само за зборови, туку за реалност што на сите нас ни дава оптимизам. Се надевам дека тоа ќе се случи и со отворање на преговорите за пристапување со ЕУ, што исто така ќе биде одличен сигнал и за Грузија бидејќи тоа е нашата заедничка перспектива.
Ова го изјави претседателката на Грузија, Саломе Зурабишвили на Република Северна Македонија, на заедничката прес-конференција со нејзиниот домаќин претседателот Стево Пендаровски.
-Ние видовме дека Северна Македонија во минатото надмина една таква пречка, би рекла посериозна пречка на нејзиниот пат кон членството во НАТО. Убедена сум дека на истиот начин Северна Македонија ќе биде во можност да ја надмине и пречката со која во моментов се соочува. Ние малите земји кои во минатото сме покажале издржливост, сме се соочиле со многу историски настани во изминатите векови, со инвазии, окупации, научивме дека треба да се биде отпорен, да се биде тврдоглав, да го знаете правецот во кој одите. Ние малите земји сме оптимисти бидејќи гледаме резултати. За нас Грузија резултат што Северна Македонија го постигна со членството во НАТО е многу силен сигнал дека врата на Алијансата е навистина отворена и дека не станува само за зборови, туку за реалност што на сите нас ни дава оптимизам. Во исто време се надевам дека тоа ќе се случи и со отворање на преговорите за пристапување , што ќе биде одличен сигнал и за Грузија бидејќи тоа е нашата заедничка перспектива, рече грузиската претседателка на новинарско прашање како ја коментира пречката со која се соочува Скопје на патот кон ЕУ.
Претседателот Пендаровски запрашан за неговиот став во однос на изјавите на еврокомесарот Оливер Вархеји за раздвојување на Скопје и Тирана на евроинтегративниот пат, рече дека не би сакал да ја коментира, но според впечатокот со средбата што ја имал со него во Брисел, смета дека Вархеји на тоа гледа како на потенцијална можност ако спорот со Бугарија се одолговлекува со години слично како со спорот со Грција.
-Ве уверувам дека во мојот разговор со него и во моите разговори во Брисел од пред 10-тина дена, апсолутно на ниту едно ниво, од ниту еден мој соговорник не ми беше поставено тоа прашање – што мислиме за евентуално раздвојување од Р Албанија. Сите буквално сите, и во Советот и во Комисијата и во одделните департменти особено оној за проширување не разслуваат за раздвојување туку сите напори, сите сили се фокусирани кон тоа до крајот на оваа година да се одржи првата Меѓувладина конференција, вели претседателот Пендаровски посочувајќи и на денешната посета на премиерот Заев во Брисел.
