ВЕСТ НА ДЕНОТ: Самит на „Економист“: Зајакнување на моментумот за европска интеграција
„Зајакнување на моментумот за европска интеграција“ е темата на годинашното издание на Самитот на најпознатиот неделен економски магазин „Економист“, што денеска се одржува во Скопје. Самитот во Скопје доаѓа во пресрет на очекуваната одлука за доделување датум за почеток на преговори за Северна Македонија и почеток на нова ера во евроинтеграциските процеси на Западен Балкан.
Меѓу гостите и панелистите се премиерот Зоран Заев, поранешниот помошник американски државен секретар за Европа и Евроазија Вес Мичел, поранешните премиери на Грција и на Белгија Алексис Ципрас и Ги Верхофштат, Мартин Шулц поранешен претседател на Европскиот Парламент…
„Доколку Европскиот совет не одлучи позитивно и не даде почеток на преговори со Северна Македонија ќе го казни најдобриот пример од државите во регионот“, рече премиерот Зоран Заев на дискусијата на Самитот.
„Овој договор ја покажува вредноста за која се бори ЕУ. Дел од него е и членството во Европската унија. Со овој договор се потврдува и амбицијата на ЕУ да воспостави мир и стабилност во овој регион. Северна Македонија е држава која го промовира процесот на проширувањето во рамките на европското законодавство. Тој покажува дека државата е кредибилен партнер за ЕУ и таа треба да одобри датум за преговори на следниот состанок на Европскиот совет“, изјави Поранешниот грчки премиер Алексис Ципрас.
Поранешниот помошник американски државен секретар за Европа и Евроазија, Вес Мичел, истакна дека Преспанскиот договор е позитивен пример што мора да биде награден.
Средба на работните групи на власта и опозицијата за Изборниот законик
Министерката за правда Рената Дескоска информира дека членовите на работната група меѓу власта и опозицијата денеска ќе имаат средба за усогласување на измените на Изборниот законик со препораките на ОБСЕ/ОДИХР.
„Минатата година пред да дојдам во Министерството за правда постоела работна група во која се разговарало за измени на Изборниот законик. Биле направени одредени измени, кои не го видоа светлото на денот, односно не беа процесирани. По тоа имаше претседателски избори кои беа оценети како фер и демократски, но во извештајот на ОБСЕ/ОДИХР имаме ситни препораки за измени во Изборниот законик“, рече Дескоска одговарајќи на новинарско прашање на прес-конференцијата по повод стапување во сила на Законот за бесплатна правна помош.
ФЛЕШ ВЕСТИ
Катица Јанева останува во притвор, одлучи Апелацискиот суд
Врховен суд ќе ја преиспитува пресудата за „мерцедесот“ на Гордана Јанкуловска
Иницијативата за една изборна единица денеска доби поддршка од СДСМ за изборни реформи
Условите за работа се главна пречка за ефективна и ефикасна работа на ДКСК, смета претседателката на Антикорупциската комисија, Билјана Ивановска на денешната презентација од Здружението на граѓани „Транспарентност Македонија“ на првиот квартален извештај за следењето на работата и постигнувањата на ДКСК
Во првото тримесечје преку МојДДВ скенирани 22.670.713 фискални сметки
Денес стапува во сила новиот Закон за бесплатна правна помош, кој на голем број граѓани ќе им овозможи пристап до правдата и остварување на нивните права. Граѓаните добиваат бесплатна правна помош и еднаков пристап до правда – адвокатот, сите судски и административни трошоци се покриваат од буџетот, соопштија од Министерството за правда
МИСЛА
Крими приказната на Северна Македонија е заплеткана и возбудлива, често и смешна, ако се гледа од страна. Ако сте заплеткани во неа, не е ни малку смешно. Најчесто, не може ништо да се направи, освен да се гледа немоќно, како криминалците успеваат да ѝ фрлат евтина јадица на јавноста и да уживаат во ефектите од лажните вести и дезинформациите. Уличарски грубо, успеаја да му дадат еден сосема поинаков тек на македонскиот од кон иднината. Им успеа да ги изедначат, да ги поистоветат сите придобивки на демократската и ненасилна борба против Режимот со самиот Режим., пишува Џабир Дерала.
Чест на жртвите и хероите (на македонски начин): Убиени, затворени, исплукани, забранети, растргнати, исклоцани, И уште не умираат, зборуваат, пишуваат, Со идеали не трујат, замараат и попуваат?, стихови на Петрит Сарачини.
Биљана Јордановска
