Макрон го уверил Пендаровски дека не нуди алтернатива на ЕУ за Скопје, но бара време
Претседателот на Северна Македонија Стево Пендаровски, по средбата со неговиот француски хомолог Емануел Макрон, порача дека има „отворен и динамичен“ разговор, но гаранции за датумот од Париз сѐ уште нема. Макрон бара време за внатрешната реформа на ЕУ.
Претседателот Пендаровски ги изложил своите аргументи пред Макрон, и ги слушнал неговите. Според Пендаровски, Франција веќе поднела неформален предлог (нон-пејпер) до земјите членки на ЕУ за реформата на методологијата на пристапните преговори за членство, реформа која Макрон ја бара пред да даде зелено светло за Северна Македонија и Албанија.
Холандскиот сенат го ратификуваше Протоколот за НАТО
Холандскиот сенат попладнево го ратификуваше Протоколот за пристапување на Северна Македонија во НАТО. Информација на неговиот Фејсбук профил ја сподели министерот за надворешни работи Никола Димитров.
По добивањето зелено светло од Холандија, Протоколот за НАТО ќе треба да го ратификуваат уште Франција и Шпанија со што земјава и формално ќе стане 30 полноправна членка на Алијансата.
Буџетот за 2020 година изнесува 3.615 милијарди евра
Буџетот за наредната година ќе изнесува 3,615 милијарди евра, а во фокусот ќе биде човечкиот капитал, односно подобар здравствен, образовен и социјален систем и силна поддршка за раст на реалниот сектор. Педесет и шест отсто од вкупните буџетски расходи ќе одат во области врз кои се потпира човечкиот капитал.
Лиле Стефанова не му одобри нов пасош на Камчев
Поранешната специјална обвинителка, Лиле Стефанова, не се согласува Орце Камчев да добие привремен документ со кој би патувал во странство поради бизнис средби. До Кривичниот суд е препратено негативно мислење на барањето на Камчев, потврдуваат од Обвинителството.
Камчев побара од судот нов привремен пасош, бидејќи претходниот, што го доби од поранешната специјална јавна обвинителка Катица Јанева и беше со траење од 6 месеци му истече пред неколку дена.
Владата ги повлече предлог измените на Законот за јавни собири
По реакциите во јавноста за новите предлог измени на Законот за јавни собири кои Владата ги предложи до Собранието на Република Северна Македонија, таа експресно ги повлече овие предлози.
„Владата на Република Северна Македонија ги слушна забелешките на граѓанските организации за најавените предлог-измени на Законот за јавни собири и на денешната 164-та седница одлучи да ги повлече предлог-измените со цел да се обезбеди поширока консултација.
ФЛЕШ ВЕСТИ
Вицепремиерот за еврпски прашања Бујар Османи смета дека се уште постои силна солидарност во ЕУ околу одредувањето на датумот за преговори со Северна Македонија, иако земјите-членки имаат многу внатрешни проблеми.
Премиерот Зоран Заев и минисерката за финансии, Нина Ангеловска истакнаа дека следната година сите кредити што ќе ги земе државата се за враќање на претходно подигнати кредити и за покривање на дефицитот од 2,3 отсто и нема да има задолжување за плати, пензии и социјални издатоци.
За одбраната се предвидени над 10 милијарди денари во новиот Предлог-буџет, усвоен на денешната владина седница. Министерката за одбрана Радмила Шекеринска денеска изјави дека со тоа „се приближуваме до зголемувањето од 0,2 процентни поени од бруто домашниот производ“, односно практично се приближуваме до 1,4 отсто, имајќи пред вид дека обврската преземена за оваа година е 1,39 проценти од БДП.
Потребите за вработување ги дефинираат институциите, а не Министерството за информатичко општество и администрација (МИОА). Огласи за нови вработувања се распишани и ќе продолжат да се распишуваат. Нема да се стопираат вработувањата заради изборите, бидејќи институциите имаат потреби. Тоа е жива материја, луѓе си одат и луѓе доаѓаат, порача денеска министерот за информатичко општество и администрација Дамјан Манчевски.
Сите мерки се преземени и сите институции се вклучени за да откријат што се случи во петокот (8 ноември) кога во кругот на фабриката „ОХИС“ истече вода од цистерна во која претходно бил складиран метил акрилат мономер, прецизираат надлежните, кои според Друштвото за собирање и примарна обработка на отпадоци Екоцентар 97 ДООЕЛ, треба да вршат контроли и ако постапките не се спроведени согласно со законот и елаборатот за заштита на животна средина, ако утврдат пропуст, да бараат одговорност.
МИСЛА
Понижени, навредени, победници?
пишува: Сашо Орданоски
Опозицијата ја има погрешено насоката („на крив пат“?!) по која се движи во надеж за изборен успех: и покрај совршената пропагандна машинерија за ширење дискредитации и лоши и лажни вести, оваа стероидна опозициска кампања составена од баби-нарикачи за секоја тема и за секој проблем го нема потенцијалот за поттикнување масовна јавна амнезија за фактот кои се причините и кои се оригиналните актери за најголемиот број проблеми за чие решавање, без сомневање, сегашната власт не покажува вештина и знаење на потребното ниво.
Голема мака со малиот Шенген
пишува: Зоран Иванов
Најди им го крајот на националистиве. Кога си копавме очи балкански, беше арно. Сега, кога си подаваме рака европски, не е на арно. Кога си ги отвориме домовите за соседите и кога и тие ги отвораат за нас, пак не чини. Нешто пак ни се подготвува. Заговор, план да нѐ уништат, да нѐ снема. Европа и САД од нас ќе прават Голема Албанија, ќе нѐ компензираат на Србија за Косово. Тоа што подаде рака на српскиот претседател, албанскиот премиер Рама дома го прогласија за непожелна персона. Тоа што српскиот претседател Вучиќ му возврати, неговите националисти го прогласија за издајник на својот род. Тоа што македонскиот премиер Заев ги угости, овдешните квази патриоти пак го етикетираа како предавник.
Дехран Муратов во соработка со: Маја Ивановска, Биљана Јордановска, Диана Тахири и Ангела Петровска
