Сопственикот на компанијата инвеститор на зградата кај Мајчин дом вчера одржа средба со граѓаните на општина Аеродром, на која присуствувале неколку повозрасни граѓанки и граѓани и еден владин мегафон, кој ете се загрижил за проблемот, конечно дошол на состанок, откако претходно испарадира на протестот чисто да види кој дошол, а не да даде поддршка.
Според соопштението на компанијата по завршувањето на средбата меѓу инвеститорот и „загрижените“ граѓани заклучокот е дека зградата ќе се гради, затоа што нема друго решение.
Ќе се осврнам на дотичниот владин мегафон, госпоѓата Нора Шаќири, не од почит, туку од презир. Госпоѓо пи-ар, загрижените аеродромци како што ги нарекувате во својот пост оние кои не присуствуваа на вчерашната средба, беа на улиците со месеци наназад, онаму каде што вие не бевте, беа на последните протести на кои се појавивте „на поминување“…, беа на вонредната седница на општина Аеродром, каде што Вие не бевте, исто така беа на поединечни средби со градоначалникот Марин, каде што исто така не бевте… Она што сте го напишале во обид да привлечете уште малку медиумско внимание, не е грижа туку его-трип.
Сè додека се објаснувате со флоскули од типот на „вашата борба“, наспроти „нашата борба“, ќе останете само мегафон и ништо повеќе. Оваа борба не е завршена и оваа борба не е ни наша, ни ваша. Оваа борба е на сите граѓани кои тоа што имаа да го кажат го кажаа на вонредната седница. Да бевте таму ќе знаевте. Всушност, граѓаните на Аеродром немаат ни најмала причина да присуствуваат на средба со инвеститорот. Тие имаат проблем со локалната власт. И претходната и сегашната. Имаат проблем со нелегално донесен ДУП од страна на минатата власт, која оваа сегашнава го искачи на пиедестал небаре се 10те божји заповеди, во време кога полесно е да смениш пол, религија, Устав, име на држава, но не и еден детален урбанистички план…
И што заклучивте госпоѓо пи-ар на вчерашната средба? Дека 150 високоизраснати дрва ќе го искомпензираат зеленилото, бидејќи најголем проблем било загадувањето? Ќе ги искомпензираат ли 150 дрва, 230 стана со по минимум еден автомобил, со 1000 нови жители, на инфраструктура од дедо Ное? И сериозно ли мислите дека граѓаните се тие кои треба да преговараат со инвеститорот за овој проблем?
Одговорност мора да има! Тоа е она што го баравме сиот овој изминат период. Одговорност од сите корумпирани бирократи, партиски послушници, градоначалници и советници кои креваат два прста во интерес на партијата, а не на граѓаните…
Да присуствувавте на „нашата борба“ (користам ваши зборови за подобро да разберете) ќе знаевте дека на последната вонредна седница не слушнавме ниту едно конкретно решение од ниту еден советник, од ниту една партија, наспроти сите конструктивни решенија понудени од граѓаните. Ќе знаевте дека тоа беше сè, само не седница на една општина. Тоа беше фарса од партиски препукувања за која, меѓу другото тие земаат плата… Отприлика како што е фарса и вашата објава од вчерашната средба.
Затоа следниот пат кога ќе се дрзнете да ги повикате аеродромци прво добро информирајте се и секако застанете во одбрана на нивните интереси со јасно изразен став!
Срдечен поздрав до следниот протест, кој според развојот на настаните ќе се случи многу наскоро!
п.с. се молат оние кои дигнаа два прста за донесување на спорниот ДУП да не го користат ова писание, како и револтот на граѓаните во политички цели. На крајот на денот, дојдовме до тука заради вашите непромислени одлуки. Отстапете од протестите против себе си и сопствените одлуки! Таква пародија нема да дозволиме!
Преземање на содржините НЕ Е ДОЗВОЛЕНО, освен со писмена дозвола од ЦИВИЛ. Повредата на авторските права е забранета со закон.
Услови за користење, авторски права и заштита на приватноста
