Заев го повикува Судскиот совет да ја оцени одговорноста на судиите за застарување на предметите
Премиерот Зоран Заев денеска во објава на Фејсбук го повика Судскиот совет да ја оцени одговорноста на судиите за застарување на некои предмети.
– Ајде кажете ни кој тоа влијае врз судиите, зошто неколку десетици предмети се чувале завршени и останале во фиоките на бившиот претседател на Врховниот суд?, наведува Заев во објавата.
Тој натаму потенцира дека нема да има компромис со криминалот.
– Нема таков суд, судија, обвинител што ќе го запре овој процес! Нема шанси! На овој наш пат треба да ја завршиме и борбата за правдата!, додава премиерот во објавата на Фејсбук.
Откажана седницата за Изборниот законик, се чека преводот на поднесените 5.899 амандмани
Откажана е денешната седница на собраниската Комисија за политички систем и односи меѓу заедниците на која требаше да почне амандманската расправа за Предлог-измените на Изборниот законик кои предвидуваат една изборна единица и отворени листи.
Претседателот на Комисијата, Александар Кирацовски, во Собранието изјави дека амандманската расправа не може да почне, бидејќи не се преведени сите амандмани поднесени на Предлог-законот.
Тој информира дека досега се преведени и ставени во електронскиот систем 3.734 амандмани од вкупно поднесените 5.899. Нагласи дека ќе ги чека службите до крајот на следната недела, па ќе закаже седница за да може да почне амандманската расправа во Комисијата за политички систем.
МТСП: На работниците да не им се кратат трошоците, регулирани со колективен договор, или договор за вработување
Министерството за труд и социјална политика ги повикува работниците и работодавачите да водат социјален дијалог за сите прашања поврзани со остварувањето на работничките права. Апелираме до работодавачите, доколу правата на трошоци за превоз и храна се регулирани со колективни договори, или со договори за вработување, да не им ги кратат на работниците овие права, бидејќи тоа е спротивно на Законот.
Законот за работните односи предвидува, односно дава можност работодавачот на свој трошок на работниците да може да им организира превоз до работа и од работа како и исхрана за време на работа. Трошокот за исхрана може да изнесува најмногу до 20% од просечната нето плата по работник исплатена во претходната година, а трошокот за превоз во висина на остварните трошоци во јавниот превоз. Трошоците за храна и превоз се предмет на договор во колективните договори и за истото треба да се договарaат работниците и работодавачите, или да се уредат со договорите за вработување.
ФЛЕШ ВЕСТИ
– Онлајн медиумите civilmedia.mk, greencivil.mk, clp.mk, drejt.mk, како дел од медумската платформа на ЦИВИЛ, frontline.mk и уште 62 други онлајн медиуми влегоа во професионалниот регистар што го изработија Советот за етика во медиумите и Здружението на новинари во соработка со Стопанската комора на Македонија.
– Претседателот на Република Северна Македонија, Стево Пендаровски, се обрати во Собранието на Република Северна Македонија.
– Мерџан Даути, адвокат на обвинетата Елизабета Најдовска користејќи го законското право да збори на мајчин Албански јазик побара од судскиот совет во процесот „Т.Н.Т“ да има можност од судот во текот судењето да се употребува Албанскиот јазик и сите докази во овој предмет да му бидат предадени преведени на неговиот мајчин јазик.
– Работата на Мешовитата македонско – бугарска комисија за историски прашања не е прекината, како што тврди претседавачот на бугарскиот тим Ангел Димитров, туку привремено паузира поради престојните избори во земјава, велат за МИА од македонскиот дел од комисијата.
– Министерот за животна средина и просторно планирање Насер Нуредини денеска соопшти дека Владата ја усвоила иницијативата на Министерството за престанок на набавки на пластика за еднократна употреба и пластична амбалажа од страна на државните институции, која ќе стапи во сила од 1 јануари 2020 година.
– Со новиот закон за легализација на дивоградби што влезе во собраниска процедура, во рамки на Охридскиот регион ќе можат да се легализираат само оние објекти што претставуваат функционална целина до 1 октомври годинава и кои според студиите за оцена на влијанијата врз животната средина и врз културното наследство не ги загрозуваат универзалните вредности согласно препораките на УНЕСКО, информира денеска министерот за транспорт и врски Горан Сугарески.
– Собранието попладнево го изгласа Законот за данок на моторни возила со кој се предвидува промена во системот на оданочување на моторните возила.
МИСЛА
„Експрес лонецот“ на македонските скандали
„Не е случајно што луѓето се подготвени да се степаат и за дебата на локален ДУП. Ако тоа не е партиско-политички инспирирано, како што веднаш сугерираа некои, тогаш е поразително на едно повисоко ниво. Намерно да се одржува оваа атмосфера во која никој никому ништо не му верува, за политичките партии и партиските функционери може да е прашање на политичка „стратегија“ за останување или повторно освојување на власта, но тоа се претвори во општествена состојба на конфликт на секој со секого. Сè е афера, сè е скандал, од паркирање на улица, до приватен или државен работен ангажман, од упис на дете во градинка, до купување лек во аптека…“, пишува Сашо Орданоски.
Верни до гроб
„За ДУИ и за „кариерата“ на Али Ахмети има многу непознаници. Сепак од она (малку) што го знаеме за него, се поставува големо и сериозно прашање: Како може на политичката и јавната сцена да се издигне и толку долго да доминира на една политичка партија чии водечки фигури ги придружуваат неброени скандали, криминал и секаков вид контроверзии?“, пишува Џабир Дерала.
Ангела Петровска, во соработка со Диана Тахири, Билјана Јордановска, Сашо Орданоски и Џабир Дерала
