ВЕСТ НА ДЕНОТ: Пратенички прашања и полемики
Републичкото Собрание денеска ја одржа 124 седница на чиј дневен ред се пратенички прашања. Ова е последна седница за пратенички прашања годинава.
На 1 јуни 2017 година јавниот долг беше 48,6 отсто од БДП, а сега е 47,7 проценти. Намален е за 0,9 отсто. За разлика од ова намалување, во периодот 2006-2017, во времето на ВМРО-ДПМНЕ, долгот беше зголемен од 20 на 48,6 отсто. Се трупаа кредити, 28 проценти од БДП, за жални врби, музеи, споменици, за лева рака – десен џеб, за непродуктивни трошоци, рече денеска премиерот Зоран Заев, одговорајќи на пратеничко прашање.
Суштините на политиките имаат директен импакт кај граѓаните кои се наши гласачи. Убеден сум дека добивам нов мандат за премиер зашто политиките што ги водевме се насочени кон државата, порача премиерот Зоран Заев на денешната собраниска седница посветена на пратенички прашања.
Нагласи дека граѓаните се свесни оти ако се врати ВМРО-ДПМНЕ на власт ќе се појават нови конфронтации дома преку меѓунационалните односи и нови кавги со Грција и Бугарија.
-Доказ и непобитен факт е дека има нула Албанци што ќе гласаат за вас, а тоа го покажуваат сите анкети. Граѓаните знаат што значи тој ризик. Втората работа е веднаш кавги со Мицотакис и Борисов, ново вето, нови горчини, ново застанување во калта и стоење во место, потенцира Заев.
Џафери: Власта и опозицијата се договорија за деблокирање на 123. собраниска седница
Владејачкото мнозинство и опозициската ВМРО-ДПМНЕ постигнаа договор да бидат усвоени сите законски предлози од 123. собраниска седница, кои се врзани со примена од 1 јануари, изјави денеска претседателот на Собранието, Талат Џафери на редовната месечна средба со собраниските известувачи.
Опозициските пратеници до вчера попладне со долги говори и реплики речиси и да ја блокираат оваа седница.
Џафери не прецизира како власта и опозицијата се договориле за гласање по овие закони и упати на лидерите на партиите.
В сабота средба на Заев и Мицкоски за техничка влада
Премиерот Зоран Заев во сабота во 17:00 часот во Владата ќе одржи средба со лидерот на опозициската ВМРО-ДПМНЕ, Христијан Мицкоски.
Според владини извори, Заев и Мицкоски ќе имаат консултации за техничката влада.
Согласно законот, опозицијата мора да дојде на консултација за предлогот за министер за внатрешни работи и тој да биде прифатен од власта (двете најголеми партии).
ФЛЕШ ВЕСТИ
Извршителите протестираат против новиот тарифник – Извршителите незадоволни од новиот тарифник што го предлага Министерството за правда, а со кој се предвидува намалување на наградата при извршување на парични побарувања од граѓани од 1.000 на 300 евра, денеска протестираат со прекин на работата.
Османи: Законот за јазици нема да се ревидира – Вицепремиерот за европски прашања Бујар Османи изјави дека Законот за јазици нема да се ревидира и оти препораките на Венецијанската комисија се однесуваат на недостигот на капацитети во институциите за негова целосна имплементација.
Судскиот совет го разреши судијата Владимир Панчевски – Републичкиот Судски совет го разреши од судиската функција поранешниот претседател на скопскиот Кривичен суд, Владимир Панчевски, потврдија за МИА од Судскиот совет. Панчевски е обвинет и за злоупотреба на службена положба за распределувањето на предметите преку АКМИС системот, но судењето сè уште не е почнато бидејќи неколку пати се одложува.
Сведок во „Титаник“: Имам повеќе пати донирано средства на ВМРО-ДПМНЕ – На денешното рочиште за случајот за изборни нерегуларности „Титаник“ беше сослушан сведок кој во 2011 година работел како советник во подрачно одделение на Министерството за финансии во Кочани, за тоа како донирал средства за политичката кампања на ВМРО-ДПМНЕ во 2011 година.
СКЕН – Политички магазин
Трогателна приказна на Лидија Лазова, жртва на режимот
Граѓанското општество меѓу стремежите и реалноста
МИСЛА
„Обично, не се впуштам во коментирање на предизборни анкети. Не само затоа што човек веќе не знае зад која анкета кој партиски интерес стои, туку и затоа што во последната деценија се потврди, на глобално ниво, дека на изборно-референдумските анкети не може да им се верува – при одговарањето на ваков вид на испитување на јавното мислење, луѓето почнаа да лажат во такви масовни бројки, што резултатите станаа ирелевантни за правење втемелена политичка анализа или, не дај Боже, некаква сериозна прогноза“, пишува Орданоски во денешната колумна „Заев би победил, ама што дека?“.
„Потребна е нова лустрација. Од почеток. Секако, прво правда за страдалниците од претходната. Прво индивидуална, семејна, политичка, граѓанска па и материјална сатисфакција на страдалниците од неодамнешната партиска лустрација“, пишува Зоран Иванов во денешната колумна „Со нови луѓе во нова лустрација“.
М. Ивановска
во соработка со Дехран Муратов, Ангела Петровска, Бибе Јордановска, Сашо Орданоски и Зоран Иванов
