Ден на благодарности: Danke Deutschland!
Доцна синоќа германскиот Бундестаг со огромно мнозинство од 476 гласа „за“, 122 „против“ и 16 воздржани пратеници ја потврди одлуката на Германија: Северна Македонија ги исполнува условите да добие датум за почеток на преговорите со Европската унија. Со оваа одлука Германија на Самитот на европските лидери во октомври ќе даде датум за почеток на преговори.
Иако останува неизвесноста од одлуката на Франција, Данска и Холандија, сепак, македонскиот државен
врв не ја пропушти можноста да изрази огромна благодарност до Германија.
„Danke Deutschland!“, напиша претседателот Стево Пендаровски на Твитер.
„Конечната одлука ја очекуваме во октомври, што ќе значи признание за граѓаните и институциите и за сите наши одлуки, напори и успеси. Ова е голем поттик, продолжуваме да работиме уште повеќе. Благодариме на сите пратеници во германскиот Бундестаг и на владиниот тим на канцеларката Ангела Меркел“, напиша премиерот Зоран Заев од Њујорк каде присуствува на генерално собрание на ОН.
Благодарност изразија и вицепремиерот за европски прашања, Бујар Османи, министерот за надворешни работи Никола Димитров, како и Независната пратеничка група на ВМРО-ДПМНЕ. Позитивни реакции стигнаа и од голем број граѓанки и граѓани што јавно преку социјалните мрежи ја изразија благодарноста до Германија.
Заев: Конечно ја комлетиравме нашата лична карта во Обединетите нации
Конечно ја комплетиравме нашата лична карта во ОН. Покрај името Република Северна Македонија, за јазик стои: македонски јазик, а за државјанство: македонско/граѓанин на Република Северна Македонија. Сега имаме исклучително добри односи со Грција, и со тоа придонесовме да зајакне регионалната стабилност и да се поттикне развојот на Западен Балкан, порача премиерот Зоран Заев на македонски јазик во своето обраќање на пленарната сесија на 74-тото Генерално собрание на ОН во Њујорк. Спогодбата од Преспа, нагласи Заев, заедно со Договорот за пријателство со Бугарија, го забрза нашето интегрирање во НАТО и ги отстрани најголемите пречки за наша интеграција во ЕУ.
Шекеринска бара поголема агилност од ЕУ во однос на поврзаноста во регионот
Министерката за одбрана, Радмила Шекеринска, која учествуваше на форум посветен на поврзаноста во Европа и Евроазија, побара од Европската Унија да покаже поголема агилност и амбициозност.
„Министерката побара поголема агилност од европските структури во процесот на интеграција во Унијата со цел развој на железничката инфраструктура во регионот бидејќи сите земји од регионот се борат со климатските промени и загадувањето на животната средина“, соопштија од нејзиниот кабинет.
ФЛЕШ ВЕСТИ
Кривичниот суд не се согласува со решението на Уставниот во врска со казните на адвокатите од „27 април“
Министерот за образование и наука Арбер Адеми ајави завршување на постапката за печатење нови учебници
Условите за аплицирање за новиот Клинички центар неповолни за домашните компании реагира Синдикатот на градежни работници
Повторно одложен изборот на главен ревизор на собраниската Комисија, ДЗР пред блокада
Нов напад врз здравствен тим, овој пат во болницата “8 Септември”
ЦИВИЛни активности
Првиот од вкупно 8 регионални семинари „Граѓански објектив: Промовирање на транспарентни и одговорни политички процеси“ ќе се одржи утре, 28 септември во Штип во хотел Оаза со почеток во 10 часот. Семинарите се дел од проектот Граѓански објектив: Промовирање на транспарентни и одговорни политички процеси, финансиран од National Endowment for Democracy, што ЦИВИЛ го имплементира веќе петта година по ред. 
ЦИВИЛ објави анкета, како дел од проектот „Зелена иднина“, во Охрид во која граѓанките и граѓаните ги искажаа своите мислења за тоа каква иднина ја очекува државата, зелена или црна. Дел од анкетираните очекуваат зелена иднина, задоволни од развојот на државата и просперитетот, а дел се крајно разочарани и не очекуваат ништо добро во иднина.
МИСЛА
Во денешната продукција на ЦИВИЛ Медиа колумнисти се: Џабир Дерала и Коста Стоименовски.
Биљана Јордановска
