Вест на денот – Дерковски: ДИК е подготвена да спроведе избори и со отворени листи
Државната изборна комисија е подготвена да спроведе парламентарни избори по било кој модел за кој би бил постигнат договор меѓу политичките партии, вклучително и за модел со отворени изборни листи, изјави денеска претседателот на ДИК, Оливер Дерковски.
Ние како институција сме подготвени, додаде тој. Функционираме континуирано и подготвени сме да го спроведеме она што ќе го договорат политичките партии.
Во врска со тоа кој изборен модел, според него, би бил најдобар, Дерковски истакна дека неговото мислење во суштина и не е релевантно, бидејќи тоа е договор на политичките партии.
Претседателот на ДИК потенцира и дека Избирачкиот список е во ред и оти во него нема т.н. фантомски гласачи.
Констатирани многу проблеми што го спречуваат учеството на лицата со попреченост на избори
Од Здружението за промоција и развој на инклузивно општество ИНКЛУЗИВА, кое и го изготви Извештајот, велат дека избирачките одбори немаат доволно вештини за поддршка на овие лица на самите избирачки места.
Благица Димитровска, претседателка на ИНКЛУЗИВА истакна дека како здружение препорачуваат Владата да преземе мерки за усогласување на законодавството со Конвенцијата на ОН, да се направат измени во Изборниот законик за обезбедување право на глас на лицата со попреченост кои живеат во установи или центри за рехабилитација, во местото на живеење, како и да се воведе критериум за пристапност до објектите каде се организира гласање. Се бара и веб страницата на ДИК да биде достапна за лица со попречености, да се направи едукација на избирачките одбори во однос на правата на лицата со попреченост, а ДИК да воведе посебна евиденција за овие лица како гласачи.
Верушевски ја тужи државата за неоснован притвор и бара 70.000 евра отштета
Зоран Верушевски, екс разузнавачот и советник за безбедност на премиерот Зоран Заев ја тужи државата за двата неосновани притвора со кои беше во затвор 11 месеца во 2015 година за случајот „Пуч“ и обвинението за неовластено поседување оружје.
Флеш вести
„Монструм“ – Убиството на децата и автомобилот од кој има траги на местото на убиството, а е однесен во близина на границата со Косово, покажува дека извршителите се професионалци. Оваа смс комуникација меѓу поранешниот заменик-министер за внатрешни работи, Џељал Бајрами и лидерот на ДУИ, Али Ахмети денеска беше прочитана на рочиштето за „Монструм” за убиството на момчињата и рибарот што се случи кај Смилковско Езеро на 12 април 2012 година.
Филипче: Мерката со укинувањето на квотите покажува одлични резултати
Со имплементирање на оваа мерка, имаме задоволни пациенти и граѓани на територијата на цела држава. Мерка која одамна требаше да биде имплементирана, оваа Влада ја имплементираше со цел да го подобри пристапот до потребната терапија и квалитетот на здравствена заштита, потенцираше министерот Филипче и додаде дека ова е само еден сегмент од комплетната реформа која се имплементира на ниво на примарна здравствена заштита.
Мисла
Од корнер: Тешко на македонизмот
Од Зоран Иванов
„ Македонизам и патриотизам во изборни местенки, во уцени на гласачи, во сомнителни апсења, во фингирани судења. Македонизам на привилегии, на корумпирани и неказниви политичари. Слушнавме и видовме. Бомбите ги разобличија, ги разголија и нивните и неговите македонизми и нивните и неговите патриотизми.
Сега пак со истите финти. Патриотизам и македонизам. Онака на готово. Откако национално чувствителните, мачни, болни и трауматични работи како оние со двојазичноста и договорите со соседите за деблокада на интеграциите му ги заврши друг, сега, онака донкихотски, ќе ја обновувал државата, ќе го враќал македонизмот.“
ДПМНЕ-овски канибализам
Од Милан Банов
„Значи, со години го следевме „балот под зборови“ на оние кои работат, па и заработуваат од гласот и, барем за мене, тој „политички јазик“ на голем број македонски политичари, пред сè на оние од ВМРО-ДПМНЕ, не се разликуваше и не се разликува премногу од оној посочен во сјајниот социолошки есеј „Зборувате ли политички“ на др. Слободан Иниќ.
Нормално, тој е и сега актуелен, го потврдува и денешното заболување на говорот и прецизно ги означува фазите низ кои минува. На пример, првата нè загрижува, но веќе индицира дека лицето е инфицирано од болеста, која се манифестира преку симптомите “сè јасност” и “сезнајност”, што ќе рече, зборува за сè и знае сè, како резултат на лачење на жлездата скромност. Во втората фаза болеста зема замав, пациентот почнува да зборува сè и сешто, а престанува функцијата на жлездата позната како интелегенција.“
Дијана Тахири во соработка со Ангела Петровска, Зоран Иванов и Милан Банов
