Едно општество за сите, различностите да обединуваат, а не да делат
Денеска во Министерството за надоврешни работи се одржа Конференцијата „Едно општество за сите, различностите да обединуваат, а не да делат“, а во дискусијата учествуваа премиерот Зоран Заев, националниот координатор за развој на културата и меѓуресорска соработка Роберт Алаѓозовски, министерот за надворешни работи Никола Димитров и шефот на Мисијата на ОБСЕ во Скопје, амбасадорот Клеменс Која, високиот комесар на ОБСЕ за национални малцинства Ламберто Заниер и шефот на делегацијата на ЕУ во Република Северна Македонија, Самуел Жбогар.
Од дискусијата, во која се вклучени и експерти, пратеници, универзитетски професори ќе произлезе конечна ревизија и заокружување на процесот за конечно донесување на Стратегијата.
„Ја скениравме нацрт-верзијата на Националната стратегедија, внесувајќи ги во неа сите конструктруктивни забелешки за интегрирање на етничките, верските, културните, јазичните разлики“, изјави Заев.
„Унапредувањето на кохезивноста на нашето општество подеднакво достапно за сите е еден од главните индикатори за успешната македонска приказна која сите сакаме да ја изградиме“, рече Димитров.
Протестот на учениците во Идризово се пренесе во Собранието, Заев рече дека на родителите им се дава избор
Седницата за пратенички прашања почна со задоцнување зашто координаторот на ДУИ Ејуп Алими со процедурално барање инсистираше пратениците да бидат надвор од собраниската сала еден час како што 11 ученици Албанци во Идризово еден месец не посетуваат настава.
Родители на 11 деца од Идризово еден месец протестираат и не ги пуштаат децата во друго училиште. Бараат тие да останат да се школуваат и од шесто до деветто одделение во село Јурумлери односно за нив да се отвори паралелка на албански јазик, а не да се упатуваат во други населени места. Според Општина Гази Баба, тоа не е финансиски одржливо зашто треба да се вработи наставен кадар.
Спасовски до 21 октомври треба да формира работната група за ветинг во МВР
Владата на вчерашната седница ја усвои информацијата и Предлог – планот за мерки, активности и динамика на спроведување на процесот на проверка (ветинг) на вработените во Министерството за внатрешни работи.
„Владата го задолжи министерот за внатрешни работи, најдоцна до 21 октомври 2019 година, да ја формира работната група утврдена за спроведување на процесот на ветингот на вработените во Министерството за внатрешни работи и преку претседателот на Собранието на Република Северна Македонија да побара во работната група да земат учество најмногу тројца претставници од политичките партии во Собранието на Република Северна Македонија, кои ќе бидат во улога на набљудувачи на процесот на ветинг во Министерството за внатрешни работи“, соопшти владината прес-служба.
ФЛЕШ ВЕСТИ
Почнуваат преговорите со Грција за изградба на интерконективниот гасовод. Во досегашната соработка меѓу властите од двете земји, утврдено е дека најадекватна траса за изградба на интерконективниот гасовод е поврзување на идната гасоводна делница Гевгелија – Неготино со актуелниот гасовод во изградба Неготино – Битола.
Законот за одбрана ќе се усогласува со обврските и правилата во НАТО
Пред 24 години на 3 октомври беше извршен атентат врз првиот претседател на Република Македонија Киро Глигоров, кој го преживеа со тешки повреди во главата.
Утврден Предлог-законот кој ќе овозможи одгледување медицински канабис, следи јавна расправа
Републичкиот јавен обвинител Љубомир Јовески ја овласти обвинителката Лиле Стефанова и понатаму да остане надлежна за предметот „Империја“
СДСМ се ребрендира и започнува кампања „На прав пат“ со силно граѓанско учество
БИСЕР НА ДЕНОТ
Христијан Мицкоски, лидер на ВМРО-ДПМНЕ ќе предложи 120 изборни единици кога ќе започнат разговорите за промени на изборниот модел. 
120 изборни единици, за секој пратеник по една? Па, нели ќе го намалувавме бројот на пратеници?
Б. Јордановска
во соработка со: Дијана Тахири, Маја Ивановска и Ангела Петровска
