ВЕСТ НА ДЕНОТ: Потпишан Колективниот договор во културата
Министерот за култура Хусни Исмаили, денеска во Министерството за култура со претставници на двата репрезентативни синдикати, СКРМ и СОНК го потпиша Колективниот договор за културата.
За спроведување на Колективниот договор, Владата донесе заклучок средствата потребни за оваа намена да се обезбедат најдоцна до 1-ви јули 2020, термин од кога најдоцна и ќе се применуваат коефициентите за вработените во културата, за што согласност дадоа и двата репрезентативни синдикати. Колективниот договор е постигнат по 15 години нерегулирани односи во културата.
Апелација одлучи: На Груевски и понатаму му се суди во „Траекторија“, застарувањето не важи
Иако пред еден месец судијата Горан Бошевски констатираше дека кривичното дело за кое се гони екс премиерот Никола Груевски во случајот „Траекторија“ е застарено, сепак Апелација го поништи ваквото решение, што значи дека на екс премиерот и понатаму му се суди за злоупотребите при изградбата на автопатите Штип-Миладиновци и Кичево -Охрид.
ВМРО-ДПМНЕ ги објави предлозите за техничката влада
ВМРО-ДПМНЕ за министер за труд и социјална политика во техничката влада ќе ја предложи д-р Рашела Мизрахи, за заменик-министер за земјоделство Цветан Трипуновски, за заменик – министер за финансии Гордана Димитриеска Кочоска и за заменик-министер за информатичко општество и администрација Невенка Стаменковска Стојковски.
Техничката влада која се очекува да биде избрана на 3 јануари, треба да ги спроведе предвремените парламентарни избори кои ќе се одржат на 12 април 2020 години.
МТСП и оваа зима ги отвори прифатните пунктови за бездомни лица
Министерството за труд и социјална политика и оваа зима ги стави во функција четирите прифатни пунктови за бездомни лица низ државата, поради најава за намалување на температурите. Во функција се ставени прифатните пунктови во Скопје, Битола, Струмица и Струга.
Пријавувањето може да се прави на следните телефонски броеви: Скопје: 071 733 171, 071 411 908, 071 261 778; Битола: 070 791 770; 071/397-272; 071/397-875; Струмица: 070 381 660; Струга: 070 317 612 / 046 781 733. По пријавата на овие телефонски броеви мобилните тимови од Центрите за социјална работа и на Црвениот крст излегуваат на терен и ги згрижуваат бездомниците во неколку пунктови во Скопје и низ Република Северна Македонија каде што добиваат чиста облека, топол оброк, греење и лекарска помош. На лицата коишто одбиваат да се сместат во некој од пунктовите им се дистрибуира вреќа за спиење, ќебе, облека, храна, информираат од Министерството за труд и социјална политика.
ФЛЕШ ВЕСТИ
Во споредба од пред шест месеци состојбата на КПУ „Скопје“ е многу подобра – Директорот на КПУ Затвор „Скопје“ Есад Рахиќ посочи дека со донации е реновиран кровот, како и дека се поставени фотоволтаични системи кои произведуваат струја за топлење на вода за потребите на затворот.
Димитров: Дипломатијата изминатите две и пол години направи голем скок кон професионализацијата, ЕУ во фокусот на 2020 – Од јуни 2017 година, до денес, 87,5 осто од дипломатите се кариерни, за разлика од периодот од 2006 до 2017 година кога тој процент изнесуваше 33.
Со субвенционирани придонеси зголемени платите на 44 940 работници – Во просек платите на овие вработени се зголемени за 4.100 денари.
Од јануари досега 163 доктори побарале потврди за странство – Во изминатите пет години бројот на поднесени барања од доктори на медицина за издавање на потврди за странство изнесува 794 и тоа во 2015 година – 171, во 2016 година -162, во 2017 година -120, во 2018 година 178, а до декември годинава -163, покажуваат податоците за кои денеска информира Лекарската комора.
Пендаровски-Џафери: Фер и демократски избори ќе бидат потврда за демократскиот капацитет на земјата
Новогодишен брифинг со новинари: „Реформските процеси за јакнење на капацитетите на МВР и интегритетот на полициските службеници, кои беа обележје на 2018 и 2019 година, резултираа со постигнување на позитивни резултати и успешно справување со криминалот“, рече министерот Оливер Спасовски на традиционалниот новогодишен брифинг со новинарите.
СКЕН – политички магазин: Лажни вести – непријател на демократијата
МИСЛА
Добро утро со Сашо Орданоски: „Шпицен“ или „тапоаголни“ кандидати? или што ќе значи ваквиот кадровски пристап и за идејата, сугерирана од Будимпешта, до крајот на февруари ВМРО-ДПМНЕ да излезе со „влада во сенка“?
Кој бега од избори? прашува Петрит Сарачини: Или, во превод, ако ја читате пропагандата на мвро-вмро и ја деконструирате низ психолошката проекција што ја еманираат со неуставниот предлог (и очекуваниот отпор), всушност тие намерно купуваат време, одолговлекуваат и бегаат од избори. Ама, ги обвинуваат другите, за она што го прават самите.
Блиц за Каракамишева: Великата професорска венецијанерка сака да се поништи сѐ, па и повисоките плати и пензии, социјални трансфери, детски додатоци… Само не нејзината диплома и позициите врз грбот на граѓанките и граѓаните, смета Џабир Дерала.
„Структури од раководството на вемерето се гневни на Мицкоски, брифираат анонимни партиски извори. Според дел од раководството на ВМРО-ДПМНЕ, со неуставниот предлог за министер за внатрешни работи, Мицкоски „тотално ја избламира партијата“, пишува Џабир Дерала во денешниот рафал „Неуспешен блиц-криг на Мицкоски, раководството гневно – ја избламирал партијата со неуставниот предлог за Ковачки“
Биљана Јордановска
во соработка со Ангела Петровска, Дехран Муратов, Маја Ивановска, Петар Клинчарски, Сашо Орданоски, Џабир Дерала и Петрит Сарачини
