ВЕСТ НА ДЕНОТ: СЛОБОДНА 2020
Диктаторите и организираниот криминал се во силна спрега во голем број држави во светот. Нивната мрачна цел е да воспостават доминација во институциите, економијата, културата и медиумите, да завладеат со животот и умот на луѓето.
Во 2020 година, милиони луѓе ќе го кренат својот глас и ќе тргнат против лагите, експлоатацијата, тиранијата и организираниот криминал насекаде во светот.
Нека 2020 година биде исполнета со радосни победи во заложбите за слобода во светот, за достоинство и човекови права, за правда и еднаквост меѓу луѓето, за мир и одржлива иднина.
Во солидарност со сите бранители на човековите права во светот, Слободна 2020 година ви посакува ЦИВИЛ
Новогодишна видео честитка на премиерот Зоран Заев
„Алфите“ се транформираа во Единица за интервентна полиција
Промовирана новата Единица за интервентна полиција што ќе делува на територијата на градот Скопје, а ќе работи во состав на Секторот за внатрешни работи во Скопје. Единицата е формирана од досегашната Единица за јавен ред и мир, Единицата за прв одговор и интервенција Алфи и Единицата за асистенции, спровод и обезбедување на транспорт.
Спасовски: Начелно немам проблеми со предложените технички министри со исклучок на МВР
Вицепремиерот и министер за внатрешни работи и иден мандатар за техничката Влада, Оливер Спасовски начелно нема проблеми со предложените технички министри од страна на опозицијата, со исклучок на техничкиот министер за внатрешни работи за кој смета дека ќе придонесе за милитаризација на МВР.
„Како иден мандатар мислам дека еден од главните принципи е да го почитуваме Уставот и во тој поглед воопшто немаме дилема дека тоа треба да биде пред се и над се. Второ, кога размислуваме за овој кандидат размислуваме и за милитаризацијата на МВР, а тоа воопшто не е потребно во демократска држава и демократско општество“, рече Спасовски.
ФЛЕШ ВЕСТИ
Во второто тримесечје скенирани близу 29 милиони фискални сметки, исплатата на поврат на ДДВ во февруари, информира Управата за јавни приходи
Првоосомничениот за незаконско приватизирано земјиште во Тетово се повика на судски имунитет
Кривична пријава за гостиварец кој преневерил пари од „Македонска пошта“ – На 2 ноември 2019 во подружница „Македонска пошта“ во Гостивар пријавениот, во својство на насочувач, противправно ги присвоил двата парични вишоци од поштенско место Градец и поштенско место Чегране, во вкупен износ од 242.300 денари
Итната медицинска помош за новогодишните празници ќе работи 24 часа
„2020 ќе биде безбедна, сојузничка, посилна година’, порача министерката за одбрана Радмила Шеќеринска, честитајќи им ги новогодишнешните празници на граѓанките и граѓаните во Северна Македонија
Граѓанско помирување втемелено врз правда и вистина посака претседателот на РСМ, Стево Пендаровски, за 2020 година
Во четири општини ќе се прошират капацитетите во установите за згрижување деца до шест години, договор што денеска го потпишуваат Владата, министерката за труд и социјална политика Мила Царовска и градоначалниците и овластените претставници на четирите општини
МИСЛА
Предновогодишното добро утро со Сашо Орданоски започна со прашањето: Е, сега баш диета?!. И уште едно: ..кого го интересира на 31 декември да чита длабокоумни анализи за изминатата и идната година?!
„А и со што ќе се занимаваме од после зимскиов одмор, таму, негде, на 13 јануари, кога повторно ќе се вратиме на „дробење“ за старите општествено-политички актери, во нова, уште една предизборна кампања? Мислите ќе биде здодевно? Нема – тие пак ќе се борат „на живот и смрт“ за тоа кој ќе ја освои власта, а ние повторно ќе се кандисуваме да го избереме помалото зло. И нема да биде сеедно…
Среќна Нова 2020“, ви посакува Орданоски.
„Вмровската матрица кога се работи за нивниот партиски интерес, нит држава признава, нит државните интереси би ги поколебале во нивните партиски калкулации и остварување на зацртаната цел. Мал милион пати нѐ убедиле во тоа… Полковникот Птица не сме да помине“, порачува Јане Ѓорѓиоски, ако нешто не е јасно слободно да се прочита уште еднаш, двапати, додека нештата не се разјаснат.
„Измина деценија на борба. Победивме едно зло. Ни претстои време на нови борби и уште поголеми победи. Европската иднина ни е на дофат на рацете. Време е, со здружен напор, да ја зграпчиме иднината што ни припаѓа“, пишува Џабир Дерала.
Новата 2020 ќе биде во „знакот на Зајакот“, предвидува Бранко Тричковски, и тоа точно на 12 април, образложувајќи дека ерата на ВМРО одамна помина затоа што:
„ВМРО е љубовна несреќа во која на асфалтот остануваат седум осмини од мозокот на Македонецот.
Кај понеотпорните, како што се нетапацираниот Антонијо или синусоидната Лигња, како флека остануваат и повеќе од седум осмини.
Во медицинската литература е забележан и случајот на некој си Мицко кој успеал да загуби десет седмини, но, тоа се ретки таленти“
А во Новата 2020 да се разбудиме посилни, погласни, похрабри и секогаш будни, ви посакува екипата ЦИВИЛаши!
Биљана Јордановска
во соработка Дехран Муратов, Џабир Дерала, Сашо Орданоски, Јане Ѓорѓиоски, Бранко Тричковски
