ВЕСТ НА ДЕНОТ: МАЈК ПОМПЕО ВО СЕВЕРНА МАКЕДОНИЈА
Претседателот Стево Пендаровски и премиерот Зоран Заев денеска во Охрид се сретнаа со државниот секретар на САД, Мајк Помпео.
Помпео, освен што беше задоволен од дочекот на државниот врв во РСМ, истакна дека САД ќе продолжи со поддршката на државата, сепак предупреди и дека треба да внимаваме на руското и кинеското влијание.
Пендаровски смета дека е неопходна зголемена американска поддршка во претстојниот период, особено што се очекува Северна Македонија да стане 30 членка на НАТО и да ги започне пристапните преговори за членство во Европската унија.
Што се однесува до блатералната средба меѓу Заев и Помпео, на која присутни беа и заменик претседателката во Владата и министерка за одбрана, Радмила Шекеринска, заменик претседателот во Владата задолжен за европски прашања, Бујар Османи и министерот за надворешни работи, Никола Димитров, се разговараше за прашањата кои се однесуваат на стабилизација и просперитет на регионот со Вашингтон како главен промотор на политиката на проширување на Алијансата со државите од Јадранската Повелба.
РЕКЕТ
Катица Јанева засега останува во притвор, како една од осомничените во случајот „Рекет“. Апелациски суд дополнително ќе одлучува по нова жалба за одбиената гаранција за укинување на притворот или за замена со куќен притвор. Претходно гарнцијата беше укината, а на тоа решение исто така имаше жалба од 26 септември, но по предметот не можеше да се одлучува затоа што беше во Апелациски по жалбата на Кривичен совет.
Истовремено одбиено е барањето на Бојан Јовановски – Боки 13, за укинување на мерка притвор. По разгледувањето на жалбата, Апелацискиот судот одлучил дека уште постои опасност тој да побегне, како и да го повтори делото.
А на Орце Камчев, дел од случајот „Рекет“, кој на на Боки 13 и на Зоран Милески Кичеец им дал 1,5 милиони евра за да го спасат од кривичен прогон за случајот на СЈО, „Империја“, во ноември му истекува времениот пасош. Камчев го побара времениот пасош поради неодложни службени патувања и задолжителна едукација.
ФЛЕШ ВЕСТИ
Министерката за правда, Рената Дескоска учествуваше на Конференција на високо ниво:„It’s all about Justice“ во Тирана поентирајќи дека праведно е да се отворат преговорите за РСМ со оглед дека од заробена, станавме држава со чиста препорака.
Владата го поздрави барањето на челниците на ЕУ за старт на преговори со Северна Македонија и Албанија
Директорот на Државниот завод за статистика, Апостол Симовски денеска изрази надеж дека политичките партии и пратениците ќе најдат разбирање и време да се посветат на што поскоро донесување на законот за спроведување на пописот, бидејќи оваа операција, како што вели, е од исклучително значење за државата и за сите граѓани.
Изјавата на поглаварот на Исламската верска заедница (ИВЗ), Сулејман Реџепи, каде на новинарско прашање околу ултиматумот кој му го поставил Скендер Бузаку за оставка од позицијата, одговара дека во Исламската верска заедница нема место за „гејови“ и дека тие треба да бидат надвор од неа, предизвика остри осуди од ЛГБТИ активистите.
МИСЛА
Македонското национално единство, Скопје 2014, Анѓушев, Али и пукањето во Мала Речица, се денешните поенти на Џевдет Хајредини.
Татин математичар (прв дел) е прв дел од рафалите на Џабир Дерала се однесува на изјавата на Мицкоски за 120 изборни единици… или за „Секој ден, најмалку по една зелена. Како да реагира човек на нешта што се полоши и од глупи вицеви?! Од друга страна, ако не реагираме, ќе мислат дека се паметни. Факторизирање на глупоста и ароганцијата“
градежната мафија денеска на таргет на Коста Стоименовски. Сакате да знаете нешто повеќе за земјишните ренти, за малверзациите, за „неразјаснети“ дозволи за градби?
„Земјишната рента и градежната мафија“, #ТатинМатематичар и ред други мисли, поенти, вести и актуелности – повелете на civilmedia.mk
Б. Јордановска
