ВЕСТ НА ДЕНОТ: Владата донесе одлука за воведување пилот програма за сеопфатно сексуално образование
Владата на РСМ на денешната седница ја прифати Информацијата на Министерството за образование и наука за воведување пилот програма за сеопфатно сексуално образование во 9-тиот степен на основното образование, во четири училишта, две во урбана средина, едно во рурална средина и едно училиште каде мнозинство од учениците се од малцинските етнички заедници.
Пилотирањето, согласно Акцискиот план е предвидено да отпочне со реализација во 2021 година, откако претходно ќе бидат завршени сите планирани чекори: изработка на материјали за обука на наставниците, обука на наставниците и изработка и пилотирање на инструментите за евалуација на пилот програмата.
Судовите во Македонија се затворени за јавноста, не ги исполнуваат условите за транспарентност
Три години по ред судовите во Македонија покажуваат слаби резултати во областа на отвореноста на институциите, односно тие се затворени, исто како и судовите на државите од регионот, покажува истражувањето на проектот „ACTION SEE“ коешто го измерило нивото на отвореност на институциите за 2018 година.
„Нивото на отвореност на судовите во Северна Македонија за 2018 година е само 43 отсто. Иако се очекуваше дека електронскиот судски портал на РСМ во 2017 година ќе допринесе во зголемувањето на транспарентноста на судовите, истражувањето покажува големи разлики помеѓу судовите“, се вели во оценката на истражувачите на „ACTION SEE“.
Спасовски: Да не шпекулираме за бегството на Спасов, истрагата нека ја утврди одговорноста
Министерот за внатрешни работи Оливер Спасовски денеска одговарајќи на новинарско прашање во врска со шпекулациите дека во бегството на поранешниот специјалец се вмешани и некои полициски службеници, нагласи дека има разни шпекулации и оти полицијата не смее своите одлуки да ги темели на ниво на шпекулации.
Истакна дека вчера конечно Јавното обвинителство во Штип отвори истрага за да се види кој се е вклучен во тој процес.
ФЛЕШ ВЕСТИ
– Претседателот на Република Северна Македонија, Стево Пендаровски, денеска престојува во официјална посета на Република Италија. Во Рим, претседателот Пендаровски на официјална церемонија беше пречекан од страна на претседателот на Република Италија, Серџо Матарела.
– Имавме средба со претставници на УПОЗ, договоривме одредени чекори кои заеднички ги преземаме со цел да се изнајде заеднички прифатливо решение и тоа ќе го работиме во периодот кој следи, во наредните две до три недели и верувам дека на крајот ќе излеземе со предлог кој ќе биде на општо задоволство, истакна денеска директорот на Фондот за здравствено осигурување Ден Дончев.
– Процесот на ветинг во полицијата тече. Избран е моделот, формирана е работна група која ќе работи на тоа дали да се оди на нов закон или измена на законските решенија. Тоа треба да заврши до почетокот на следната година и оттогаш да почне проверката, истакна министерот за внатрешни работи одговорајќи на новинарски прашања при денешната посета на Валандово, оценувајќи дека предвремените парламентарни избори нема да го пролонгираат тој процес.
– Само во првите шест месеци од годинава државните инспектори казниле 242 субјекти и загадувачи на животната средина, што е значително повеќе во однос на лани, кога биле изречени 110 казни, истакна денеска заменик министерот за животна средина и просторно планирање Јани Макрадули на презентацијата на проектите од областа на животната средина, кофинансирани преку повеќе инструменти на Фондот за иновации и технолошки развој (ФИТР).
– Прогресивниот данок не се укинува туку го ставаме во мирување. Во следниот период ќе се работи дизајн на оптимално решение што ќе биде фер, ефикасно и сеопфатно. Ова го истакнува министерката за финансии Нина Ангеловска во интервју за Македонската телевизија.
– Многу лоша слика, што никогаш не сум видел. Имаше многу мртви и заглавени под автобусот што не можеме да ги извадиме, изјави еден од очевидците, жител на селото Ласкарци кој меѓу првите пристигнал на местото на превртениот автобус, на денешното судење за сообраќајната несреќа од 13 февруари годинава, во која животот го загубија 16, а 37 лица беа потешко повредени.
– Претседателот Стево Пендаровски идната недела ќе се сретне со неговиот француски колега Емануел Макрон, и ќе има можност директно од шефот на француската држава да ги слушне ставовите на Франција за проширувањето и за новата методологија на преговарање.
МИСЛА
Република во пламен
„Не сум сигурен кој би бил логичниот одговор на прашањето како, после десетици запалени автомобили само оваа година во Штип, да не може да се открие кој ги пали возилата? Истото се однесува и на организираното палење, за една ноќ, на десетина пластични контејнери во Скопје – како е можно веќе утрината да немаме приведени и осомничени за таков тежок и опасен вид на вандализам, со значителна материјална штета?“, пишува Сашо Орданоски.
Избори има да нема
„Не омекна толку срцето на Франција колку што Америка ја стисна својата натовска тупаница. По наглото свртување на францускиот реморкер под закана на американската ласерска рампа од Вашингтон, попушта студенилото на Макрон. Тој сега само бара начин како елегантно да се извлече од своето ригидно не за проширувањето. Воедно е и многу погодно алиби да ретерираат и домашните тркачи по гласови. Макрон ги извади на предизборниот терен, Макрон ќе ги враќа во соблекувалната. Нема вонредни парламентарни“, пишува Зоран Иванов.
Ангела Петровска во соработка со: Дијана Тахири, Сашо Орданоски и Зоран Иванов.
