Здружението на граѓани од текстилната, кожарската и чевларската индустрија „Гласен Текстилец“ од Штип спроведоа анонимна онлајн анкета за прекршување на работничките и човековите права.
Дури 77,6% од анкетираните одговориле дека работничките права им биле прекршени, а 74,6% од нив, не пријавиле до надлежните институции ниту еден случај!
Предвиденото право според Законот за работни односи – да им биде платена прекувремената работа и работата за празници, не го оствариле 78,1% од работниците, а 81,5% не можеле да го искористат целосно годишниот одмор! Низ востановената пракса – „враќање К-15 на рака“, поминале 84,6% од анкетираните работници, а 31,3% добиле плата во плик.
Дури 95,5% се согласни дека Трудовиот инспекторат не работи согласно законот и во интерес на работниците, туку според забелешките, „само да го наполнат џебот од газдите“.
75,4% од анкетираните работници во синдикалното организирање гледаат можност за подобрување на условите за работа и за заштита на работничките права.
За целокупната состојба со работничките права сведочи забелешката на една анкетирана работничка: „Мене ме оставија без породилно и платени придонеси, и на -24 Ц, без греење“.
Од здружението „Гласен текстилец“ апелираат до надлежните да реагираат на сите злоупотреби на работно место, но, како што изјавија за ЦИВИЛ Медиа, и до работниците – самите да пријавуваат, бидејќи како здружение можат да реагираат само со претставки до Инспекторатот.
Б. Ј.