Министерот за култура, Хусни Исмаили, соопшти дека имал средба со рускиот амбасадор, Сергеј Баздникин. Во соопштението, македонскиот министер за култура се пофали дека, заедно со рускиот амбасадор, „ја потенцирале досегашната одлична соработка во делот на културата меѓу двете земји“.
***
Тие на средбата, заедно, во хор читале една изјава на македонски јазик со руски акцент во која се воспева соработката што „резултираше со реализација на повеќе квалитетни содржини“.
***
Од балконот на македонското министерство за култура, ечеле песни на македонски и руски јазик, а најмногу се слушале тапкања по рамо и извици на восхитување еден од друг.
Македонскиот министер за култура и рускиот амбасадор се согласиле дека најубави биле деновите на „традиционалната соработка“ од времето на партиската култура на Режимот што го спроведуваше поранешната министерка за култура Елизабета Канческа-Милевска во соработка со руската држава. Таа традиција значеше и бројни патувања и милиони евра за да му се овозможи силен руски шмек на најуметничкиот проект во Европа, Скопје 2014.
Исмаили и Баздникин се согласиле, па и нагласиле и истакнале, дека Канческа-Милевска и нејзиниот тим почесто патуваа во Москва отколку што просечен жител на Скопје патува од Ѓорче Петров до Матка во текот на целиот живот. Воедно, соодветно на претходно договорената агенда, тие на своите лаптопи ја разгледале и хотелската понуда на Москва и Санкт Петерсбург. Екстра од тоа, Баздникин на својот домаќин му понудил и прошетка до новите руски територии на Крим кој Руската Федерација достоинствено го анектираше во 2014 година.
Исмаили и Баздникин се договориле да ја збогатат традицијата на соработка, интензивирана од Канческа-Милеска и да ги надминат сите нејзини успеси, вклучувајќи ги и сумите и бројот на патувањата. Се договорија, онака гушнати на балконот, дека претставници на македонското министерство ќе одат во Москва почесто отколку што просечен македонски пензионер посетува аптеки.
Откако завршиле репрезентативните резерви од вотка во подрумите на Министерството за култура, тие прешле на македонска ракија и турски чај. На крајот, двајцата високодостоинственици завршија на крцкавиот паркет во кабинетот на министерот, седејќи со скрстени нозе и пиејќи албански коњак со голема количина шеќер париња и семки од кајсии. Во знак на големо пријателство и доверба, Баздникин на Исмаили му подарил комплет озвучени руски бабушки во облик на Бетмен.
Баздникин покажал посебна благодарност за квалитетниот албански коњак и споделил со домаќинот информации за врските на опозицијата во Албанија со руските „традиции“… За јавноста е помалку познато дека сопругите на двајцата, сега веќе традиционални, другари, строго, но без голема врева, ги прекинале нивните разговори и ги земале под мишка накај дома, додека тие си мавтале еден на друг и си ветувале меѓусебна поддршка и бројни посети на Москва.
Александар М. Арнаудов – Роки
Оградување, одбрана и заштита:
Секоја сличност на овој текст со реалноста е (не)намерна.
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон. Врз основа на договор за соработка, оваа содржина е достапна за Плусинфо и Слободен печат без ограничувања.
