Покачување на платите во повеќе сектори, субвенционирање на придонесите за плати во приватниот сектор, посебно внимание и проекти што ќе ги мотивираат младите да останат во земјата, низа мерки за намалување на невработеноста… Ова е само еден дел од информациите што од високи извори на СДСМ беа споделени на брифингот вечерва, на кој беа презентирани и резултатите од истражувањето на јавното мислење според кое СДСМ е во предност во сите значајни теми и области.
Меѓу другото, на брифингот беше кажано и дека сѐ поизвесно е покачувањето на минималната плата на 16.000 денари, како и покачувањето на просечната плата. Проектот Мој ДДВ дава одлични резултати. Се прават напори за намалување на сивата економија и плаќањето на дел од платата на вработените во кеш. Дел од мерките на владата предводена од СДСМ во оваа насока ќе биде и субвенционирањето на придонесите при покачувањето на платите до сто евра.
На брифингот се говореше за правната држава како апсолутен приоритет на владиниот тим. Се работи на сите аспекти на владеење на правото, а отворени се и прашањата за ветингот во правосудството. Сепак, за ветинг ќе стане збор дури по добивањето датум за почеток на преговорите за членство во ЕУ, за кое во СДСМ владее цврсто убедување дека ќе се случи во октомври. За ветинг во правосудството не се говори сега, бидејќи тоа, според изворите од владејачката партија, може да испрати погрешен сигнал дека земјата е зад Албанија која тој процес го започна многу порано. Според СДСМ, одложување од два месеци за почеток на тој процес, сепак, не се голема разлика.
„Оваа власт покажа дека не сака да се меша во судството.“ – велат од СДСМ. Постои клиентелизам и низа други негативни појави, но постои и одлучност тие и да се надминат.
Како ќе изгледаше случајот „Рекет“ да се случеше пред 3 години? Провладиниот медиум никој немаше да го чепне, парите ќе беа земени, судиите и обвинителите ќе молчеа… – е краткиот опис за тоа како изгледаше правдата за време на режимот, а според СДСМ, развојот на настаните во овој случај говори дека власта не прави компромиси во борбата против криминалот и корупцијата.
Сепак, констатирано е дека голем дел од судските одлуки се одлага поради проблемите со капацитетот и на судовите и на обвинителствата, кои работат со некои две третини од расположливите човечки ресурси. Предметите на СЈО се решаваат со неприфатливо бавно темпо, според СДСМ.
Сериозни се знаците дека ќе се постигне договор за законот за јавното обвинителство, без преминување на црвените линии кои ги постави СДСМ, а тоа се опстанок на предметите на СЈО и стандардите со кои ќе се обезбеди независно и ефикасно обвинителство.
СДСМ смета дека е сосема прифатлив предлогот од опозициските политички партии на Албанците ветингот во судството да го водат странци, но под услов и опозициската ВМРО-ДПМНЕ да го побара тоа.
Што се однесува до барањето за предвремени избори, нема логика да се разговара за тоа, бидејќи во тек се процеси и проекти од високо државно значење. Едноставно, нема простор за таков разговор пред да се добие ЕУ датумот и пред конечниот прием во НАТО во декември.
По прашањето за пописот, според СДСМ, тој треба да се одржи што поскоро, односно во закажаниот термин, од 1 до 30 април 2020 година. ВМРО-ДПМНЕ пред директорот на Агенцијата за статистика излегле со 23 забелешки. Меѓу другото, ВМРО бара анкетарите да работат во групи, а не индивидуално, за да се избегнело лажирањето на резултатите. Исто така, ВМРО-ДПМНЕ бара пописот да се спроведе во 2021 година. Според стандардите на Евростат, не мора да се попишат државјани што се надвор од државата подолго од една година, односно постои можноста тие да се попишат како дијаспора.
СДСМ уште еднаш ја изрази својата поддршка на идејата за една изборна единица, но и за отворени листи.
Според СДСМ, парламентарни избори ќе се одржат во втората половина на октомври 2020 година, а техничка влада ќе има сто дена пред избори, според законските решенија што произлегуваат од Договорот во Пржино (2015 година).
Џ. Дерала
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон. Врз основа на договор за соработка, оваа содржина е достапна за Плусинфо и Слободен печат без ограничувања.
