Македонската јавност е во исчекување на исходот од преговорите меѓу Зоран Заев и Христијан Мицкоски, што се одвиваат зад затворени врати во Собранието на РСМ. На овие преговори кои траат сега речиси пет часа, преговарачите имаат различни агенди. Иако темата е донесување на закон за јавно обвинителство, фокусот на Мицкоски од ВМРО-ДПМНЕ е стопирање на истрагите и судските случаи што ги започна СЈО.
Во текот на ноќта, медиумите беа арена на спротивставените агенди. ВМРО-ДПМНЕ се обиде, релативно успешно, да ја подметне идејата дека лидерите се согласиле дека СЈО е мртво.
Излезе дека тоа не е точно. Извори од зад затворените врати, како што објави ЦИВИЛ Медиа претходно, брифираа дека за власта ова е затворено прашање, бидејќи со предавањето на предметите од СЈО кај ЈО, сега предметите на СЈО никако не зависат од политичарите. Предметите зависат исклучиво од независната правосудна институција предводена од Љубомир Јовески. Според нашите извори, „главна цел на ВМРО-ДПМНЕ им е предметите од СЈО да не продолжат, односно обвинетите од оваа партија да не одговараат пред правосудството. Постојано ја враќаат таа тема за дискусија“.
Додека македонската јавност со нетрпение го чека исходот од овие мачни и неизвесни преговори, добро е да се потсетиме на правното мислење на Врховниот суд на 30 јануари, според кое „СЈО не смее да отвора нови случаи по 30 јуни 2017“, што било утврдено по иницијативите на адвокатите Боро Тасевски и Еленко Миланов, бранители на осомничените високи функционери на поранешната власт. Повеќе за ова може да се прочита во Хронологијата на процесот на донесување на Законот за јавното обвинителство, што ја објави ЦИВИЛ Медиа на 28 август.
Неизвесно е кога ќе завршат, ако завршат преговорите ноќва, па затоа е добро читателките и читателите да се потсетат дека „правното мислење“ на Врховниот суд беше еден од најсериозните удари што на почетокот на 2019 година го доживеа СЈО. Голем удар за СЈО беше и случајот што, крајно погрешно, е наречен „Рекет“. Овој случај е илустрација за тоа колку длабоко е навлезена корупцијата во системот, но и за тоа дека, правда, сепак, ќе има. Во други услови, до само пред три години, никој немаше да биде засегнат од еден ваков скандал. Ниту обвинителството ќе покренеше истраги, ниту ќе се разнишаше од корен медиум што важи за близок до власта, а уште помалку ќе имаше луѓе во притвор. Затоа, во исчекување на исходот, ако го има, од преговорите Заев – Мицкоски, добро е да се прочита и Хронологијата на настаните поврзани со случајот наречен „Рекет“.
Во меѓувреме, јавноста се надева дека правда, сепак, ќе има и дека работата на СЈО нема да биде залудна. Судејќи по цврстиот став на премиерот Заев, СЈО ќе продолжи да живее.
Џ. Дерала
Хронологија на процесот на донесување на Законот за јавното обвинителство
