Државната комисија за спречување на корупција и судир на интереси, денеска започна со тридневна работилница за изработка на Национална стратегија за спречување на корупцијата и судирот на интереси 2020 -2024.
Почетокот на работилницата на која учествуваат претставници на сите релевантни институции и организации, како и домашни и меѓународни експерти, го означија воведните излагања на претседателката на ДКСК, Билјана Ивановска, претседателот на Собранието, Талат Џафери, вицепремиерот за европски прашања, Бујар Османи, министерот без ресор за комуникации, транспарентност и отчетност, Роберт Поповски и проф. д-р Методиј Чепреганов.
Ивановска во своето обраќање ги претстави главните цели на оваа работилница, под мотото „Со ум во антикорупциски бум“, јакнење на свеста кај граѓанките и граѓаните, но и укажување дека борбата против корупцијата не е само борба на ДКСК, туку одговорност на луѓе во државата.
„Секоја поединечна победа е значајно камче во мозаикот на нашето здраво општество“, изјави Ивановска.
Претседателот на Собранието, Талат Џафери, потсетувајќи на начинот на кој се одбраа претседателката и членовите на ДКСК, истакна дека тие ја имаат клучната улога во борбата против корупцијата. Според него, најголемиот проблем со кој се соочува Комисијата е промената на свеста кај функционерите и администрацијата, но и на граѓаните.
„Генерално е добро што антикоруциската политика е во јавниот дискурс и покрај обидите да не одвратат со други, етнички и слични, теми. Сметам дека треба да инсистираме сите ова да ни биде владеењето на правото и правната држава да биде тема на која ќе зборуваат сите, и владините и невладините чинители во општеството“, истакна вицепремиерот за европски прашања Бујар Османи, укажувајќи дека тоа се фундаментални очекувања на земјите-членки на ЕУ во пресрет на одлуката за добивање датум за почеток на преговори.
Министерот без ресор задолжен за комуникации, транспарентност и отчетност Роберт Поповски истакна дека во борбата против корупцијата, една од мерките на Владата е и усвојување на Кодексот на етичко однесување на сите владини претставници и функционери, со што може да се постигне јакнење на институциите и враќање на довербата на граѓаните во истите.
„Постои апсолутна политичка волја за справување со корупцијата во државата“, истакна Поповски.
„Алчноста, страстите, во кои спаѓа корупцијата и подмитливоста во еден мал дел од тоа, и другите човечки страсти, се секогаш составен дел од психопрофилот на една лошо изградена личност. Тоа не сакам да го изгубите од вид при носење на сит ваши одлуки. Превенцијата бара време, воспитание, образование, инкорпорација на социјални, морални, етички и духовни норми, како и спремност на личноста сите тие параметри да ги прифати, осознае, научи и применува“, изјави професорот Чепреганов во своето обраќање кое не само што го профилираше општеството во кое живееме, туку даде јасна слика на профилот на луѓето што најчесто ја водат државата.
Државната комисија за спречување корупција и судир на интереси овие три дена ќе работи на идентификација на ризиците од корупција, мерки за превенција од корупција и анализа на предложените мерки наспроти идентификуваниот ризик / состојба, со користење на SMART методата.
Биљана Јордановска
Камера: Ариан Мехмети
