Самитот на Г20, кој првпат ќе се одржи на африканскиот континент, се одвива во сенка на политички тензии по одлуката на претседателот на САД, Доналд Трамп, да го бојкотира настанот. Американската администрација најави дека ниту еден владин претставник нема да присуствува на собирот во Јоханесбург, закажан за 22 и 23 ноември.
Трамп ја оправда одлуката со тврдења дека јужноафриканската влада води политика на дискриминација против белата малцинска група Африканери — обвинувања што Преторија ги отфрли како „политички мотивирани“. Претседателот Сирил Рамафоса одговори дека бојкотот е „нивна загуба“ и најави дека самитот ќе биде посветен на темата „Солидарност, еднаквост, одржливост“.
Според анализата на Financial Times и Politico, отсуството на САД може да ја ослаби улогата на Г20 како форум за глобална соработка, отворајќи простор за поголемо влијание на Кина, Индија и Русија во клучни прашања како енергетската транзиција и климатската агенда.
Фактот дека самитот се одржува во Африка носи голема симболика. Континентот е сѐ поважен играч во глобалната енергетска и климатска политика, а бројни аналитичари очекуваа дека Јужна Африка ќе ја искористи оваа прилика за да ја засили својата дипломатска позиција.
Но, без присуството на САД, дел од експертите предупредуваат дека самитот може да заврши со ограничен ефект.
„Ова е историски момент за Африка, но и тест за Г20 — дали може да опстане како глобален форум ако најмоќниот член избере да ја игнорира масата,“ пишува Politico.
Г20 е меѓувладин форум составен од министрите за финансии и гувернерите на Централната банка од 20 економии: 19 држави, плус Европската унија (ЕУ) и Африканската Унија (АУ).
