На 27 и 28 ноември, 2019 година, во хотел Холидеј Ин, Скопје, со почеток од 09:30 часот, а во
организација на Фондацијата Метаморфозис, ќе се одржи 15та Меѓународна Конференција ESociety.mk – Отворени институции и отчетност.Конференцијата ќе ја отворат Бардил Јашари, Фондација за Интернет и Општество Метаморфозис, Роберт Поповски, Mинистер без ресор задолжен за комуникации, отчетност и транспарентност и Фани Каранфилова – Пановска, Фондација Отворено Општество Македонија, а изјави за медиумите се предвидени веднаш по свеченото отворање во 10:30 часот.
Конференцијата е завршен настан на четиригодишниот проект ACTION SEE (Одговорност, Технологија и Мрежа на Институционална Отвореност во Југоисточна Европа) во кој 7 организации од Западен Балкан и Обединетото Кралство ги соединија своите напори за промовирање и обезбедување одговорност и транспарентност на властите во регионот на Југоисточна Европа. Основната цел на проектот е да се зголеми вклученоста на граѓанското општество и медиумските организации во процесите на донесување одлуки и креирање на јавното мислење и политики, како и да се зголеми капацитетот на граѓанските општества за решавање на чувствителни проблеми. Се очекува на конференцијата да присуствуваат околу 150 претставници на институции од Западен Балкан, граѓанското општество и медиумски организации, како и поединци од регионот на Западен Балкан.
Во текот на Конференцијата ќе се одржат повеќе сесии каде регионалните партнери на проектот
ACTION SEE ќе ги презентираат резултатите од четири годишните напори за зголемување на нивото
на отвореност и отчетност на институциите, како и за значењето на регионалната соработка за
унапредување на доброто владеење.
Претставници на најдобро рангираните општини според Индексот на отвореност (https://opennessindex.actionsee.org/): општина Струмица на национално и општина Приштина на регионално ниво, ќе ги споделат нивните искуства во развивање на методи за подобрување на институционалната отвореност на локалните власти.
Паралелно на споменатите сесии, ќе бидат организирани и две дебати на актуелни теми. Првата е
посветена на Правната усогласеност на GDPR и Полициската директива 2016/680 во националното
законодавство каде ќе се говори за процесот на креирање на нов Закон за заштита на личните
податоци и за итната потреба за усогласување на националното законодавство со Полициската Директива. На втората дебата, предмет на дискусија ќе бидат методи за ширење на медиумска писменост и критичко мислење, нивната ефективност и потребата за нивно надградување.
