Во денешната програма на „Утрински брифинг“ Маја Ивановска од ЦИВИЛ зборуваше за најновите активности на организацијата во изборен контекст.
„Без разлика на моменталната ситуација и одложувањето на изборите поради пандемијата од КОВИД-19, ЦИВИЛ продолжи со своите активности кои вклучуваат долгорочен мониторинг на изборите. ЦИВИЛ има обезбедено средства за 220 набљудувачи. Ако до вчера беа ангажирани 19, веќе од денеска имаме 24 долгорочни набљудувачи. Долгорочниот мониторинг се спроведува согласно методологијата која е воспоставена во 2008 година, кога за прв пат започнавме со мониторинг на изборните процеси во земјата и таа методологија постојано се развива и надоградува согласно промените кои се случуваат во нашата држава, а нив ги има многу“, изјави Ивановска за Утрински брифинг.
„Ги набљудуваме настаните и активностите на политичките партии со посебен фокус на политичката корупција, колективно однесување на политичките партии, но и структурите кои се дел од администрацијата и институциите (партиско вработување, коруптивно однесување на активисти и функционери кои даваат ветувања со коруптивна димензија, односно сите оние однесувања кои не се дел од вообичаените и воспоставени политички практики). Со голем успех ловиме лажни вести, говор на омраза и црната пропаганда и тука сме меѓу водечките организации кои го мониторираат овој дел.
Ние сме генерално мала екипа, па и затоа во нашата долгогодишна пракса многу се потпираме и на пријавите кои секојдневно пристигнуваат до нас од граѓанки и граѓани од целата земја. Всушност помошта од граѓанките и граѓаните е показател дека сме организација која ужива голема доверба кај луѓето“, истакна Ивановска.
Во однос на тоа кој е ставот на организацијата за одржување на предвремени парламентарни избори, Ивановска потенцираше дека изборниот процес мора да продолжи онаму каде што застана веднаш по олабавувањето на мерките.
„Ние во ЦИВИЛ имавме став за одржувањето на изборите дури и пред политичките партии. Бевме за брзи избори во декември минатата година. И сега стоиме на ставот дека веднаш по олабавувањето на мерките и завршувањето на вонредната состојба изборниот процес треба да продолжи онаму каде што застана. Секако дека ситуацијата во која се наоѓа светот, па и ние во однос на пандемијата ќе наметне нови услови и практики во спроведувањето на изборите, но останува фактот дека потребни ни се функционални институции и парламент. Кога веќе политичките чинители не успеаја да се договорат за свикување на Собранието, единствената работа која ни останува се изборите. Тоа е единствениот излез од оваа ситуација и кога станува збор за понатамошното справување со корона вирусот, но и кога станува збор за последиците кои како држава и општество ќе ги трпиме во наредниот период. Да не заборавиме, пред нас е и еден исклучително важен период кога станува збор за иднината на државата, а тоа се почетокот на преговорите со Европската Унија. Должност на политичарите, но и на нам граѓаните ни е да покажеме дека сме сериозна држава која има капацитет да се справи со ситуацијата. Тоа е ставот на ЦИВИЛ кој изминатиов период го градиме врз основа на консултациите со експертскиот тим“, рече Ивановска.
За работата на техничката влада генералниот заклучок на организацијата е дека има сериозни пропусти во работата на истата.
„Како што веќе реков, долгорочниот мониторинг на ЦИВИЛ подразбира набљудување на настаните, активностите и однесувањето на политичките партии во изминатиот период. Во контекст на наодите поврзани со работата на техничката влада морам да истакнам дека бележиме голем број на пропусти во однос на квалитетот на спроведувањето на активностите кои се типични за една влада. Нашиот генерален заклучок е дека однесувањето на политичките партии, за жал, говори за тоа дека институциите се користат за спроведување на партиска агенда, а не агенда на една влада“, изјави Ивановска.
За тоа дали и на кој начин работата на набљудувачите ќе се промени во наредниот период, Ивановска одговори дека се подготвуваат протоколи за набљудувачите кои ќе бидат во согласност со препораките на здравствените институции.
„Што се однесува до пандемијата ЦИВИЛ како организација од првиот ден, кога се појави првиот случај на заболен во земјава максимално вложува во својата медиумска платформа за брзо, навремено и точно информирање на јавноста за состојбите со корона вирусот. Секако, случувањата наметнаа поинаков начин на работа, но мислам дека успешно успеавме да се носиме со ситуацијата. Направивме протокол за однесување на секој член од екипата, но и за надворешните соработници. Работиме на утврдување на протокол и за краткорочниот мониторинг кој подразбира набљудување на денот на изборите, секако во согласност со препораките на здравствените институции.
Па во таа смисла и еден дел од мониторингот ќе биде фокусиран на тоа дали Државната изборна комисија како организатор, избирачките одбори и комисии, но и политичките партии како учесници во процесот, ќе се придржуваат до мерките и упатствата за спречување на вирусот. Ако до пред пандемијата имавме 14 категории на нерегуларности кои ги бележиме во извештаите, сега додаваме уште една категорија, а тоа е начинот на спроведување на изборниот процес со мерките за заштита“, додаде таа.
