Денес беше предадена во употреба новоизградената модуларна ковид-болница во кичевската општа болница. На денешното отварање на модуларната болница присуствуваше амбасадорката на Германија во земјава, Н.Е. Анке Гизеле Холштајн, со чија помош беа обезбедени средства за финализација на овој објект. Проектот го реализираше граѓанската асоцијација Центар за граѓанска иницијатива Прилеп.
Инаку вкупната вредност на оваа донација е 41.000 евра, а се имплементира преку Министерството за надворешни работи на Германија. Директорот на кичевската општа болница им се заблагодари на сите што дале голем придонес во изградбата на оваа нова модуларна ковид-амбуланта, од градоначалникот Фатмир Дехари, до амбасадорката на Германија и сите останати.
„Во оваа прилика сакам да одадам јавно признание за одличната соработка од германска и македонска страна, која беше потпомогната од граѓанската асоцијација Центар за граѓанска иницијатива Прилеп, кои што беа иницијатори за оваа донација. Проектот кој го финансираше германската амбасада опфаќа проширување на болничките простории, односно алтернативна нега на нашите пациенти и грижата за пациентите болни од ковид-19 – рече директорот на Општата болница д-р Станко Трпески.
Директорот на болницата Трпески, на германската амбасадорка и додели специјална благодарница за придонесот што го има во изградбата на оваа модуларна болничка единица.
Кристина Павлоски, заменик директор за програми на ЦГИ – Прилеп изрази задоволство до сите инволвирани страни за изградбата на модуларната болница во Кичево, додавајќи дека болницата се изгради за помалку од еден месец.
„Без поддршката на Германската амбасада и без соработката со локалните институции ние како Центар за граѓанска иницијатива не би можеле да направиме ништо, а сето ова што го правиме е за доброто на граѓаните“, додаде Павлоски.
текст, камера и монтажа: Дехран Муратов
фотографија: Горан Наумовски
