Ромска „Јавна соба“ се појави пред речиси два месеца на социјалната мрежа Фејсбук на која се објавуваат компромитирачки и експлицитни приватни фотографии и видеа на жени и девојки Ромки за истите да се деморализираат, обезвреднат, наврдуваат и бидат прикажани со прст.
На 21 август 2021 година на социјалната мрежа Фејсбук се појави фан страна која има над 1.600 следбеници (која намерно не ја објавуваме за јавноста за дополнително да не ги изложуваме на „јавен суд“), на која се објавуваат компромитирачки и експлицитни приватни фотографии и видеа од девојки Ромки.
На Фејсбук страницата исто така е објавен и повик за собирање на експлицитни фотографии и видеа од жени и девојки Ромки со цел нивно објавување, и како што е наведено во објавата, „јавно прикажување на „нечесните жени“. Исто така, администраторот на страницата во неколку објави ги прашува следбениците: „Сакате ли да го видите видеото без цензура на …“
Од Иницијативата на жени на Шуто Оризари регираат и велат дека се згрозени од последните случаи на сексуално вознемирување на жени и девојки Ромки на социјалните мрежи и бараат од надлежните институции како што се МВР, ОЈО, Комисијата за спречување и заштита од дискриминација и Агенцијата за заштита на лични податоци веднаш и итно да постапат по допрен глас и да ги елиминираат овие штетни практики кои имаат за цел да ги нарушат достоинството и угледот на жените Ромки!
„Заедно со пратеничката Љатифа Шиковска имавме средба со инспекторите од Министерството за внатрешни работи задолжени за сајбер криминал. Сакаме да Ве известиме дека по поднесеното барање, Министерството за внатрешни работи понатаму ќе започе истрага за ова кривично дело. На самите објави има приватни фотографии и видеа од Ромки кои што живеат во Република Северна Македонија, но и надвор од нашата држава. Сите објави на спорната Фејсбук – страница, предизвикува лавина од вознемирувачки коментари и говор на омраза од поединци, како и повици за јавен линч со што се повредува достоинството на Ромките чии фотографии се објавени“, велат од Иницијативата на жени на Шуто Оризари.
Но, во истата Фејсбук страница се споделуваат и политички содржини, односно поддршка за кандидатот за градоначалник на Шуто Оризари, Тефик Махмут од Левица, додека за неговите противкандидати има црна кампања и говор на омраза…
ЦИВИЛ го осудува овој грозоморен чин и во петок (08.10.2021) ја пријави Фејсбук страница во Министерството за внатрешни работи, Одделот за компјутерски криминал и Дигитална форензика и Основното јавно обвинителство за итно да преземат мерки, односно да ја изгаснат оваа страница и да ги откријат администраторите на страницата, и соодветно да ги санкционираат.
Во моментов Фејсбук страницата се уште е достапна.
