Министерката за труд и социјална политика Јованка Тренчевска се надева дека до 11 април за кога е закажан штрајк на вработените во училиштата и градинките ќе има договор помеѓу Владата и СОНК со цел згрижувањето на децата да може да се одвива непречено. Но, вели, и доколу не биде постигнат договор и вработените штрајкуваат, директорите на градинките мора да најдат начин да ги згрижат децата кои ќе дојдат, пренесува МИА.
-Се надевам дека ќе има договор до 11 април, меѓутоа и согласно Законот за детска заштита градинките мора да ги згрижат дечињата кои што се дојдени овде. Општината е должна, директорите на детска градинка треба да се обратат до општините, сите оние кои што ќе штрајкуваат да бидат заменети со кадар така што градинката мора да работи. Легитимно право е да се штрајкува, меѓутоа и по закон и по Устав е дечињата да бидат згрижени, изјави министерката во одговор на новинарско прашање по отворањето на детска библиотека во ЈОУДГ Буба Мара – објект Пчелка 1.
Директорката на оваа градинка во Општина Аеродром, Елена Устамитова истакна дека дијалогот за ова прашање се уште трае и оти чекаат од СОНК известување за евентуалното одржување на штрајкот.
– Дијалогот се уште трае. Додека ние немаме официјално од СОНК информации дека штрајкот почнува, се надевам дека, затоа што за добро за сите нас, и за децата и за нас како вработени, е преку дијалог да се реши тоа. Ќе се организира секако, но процесот на згрижување на деца нема да застане. Ќе се организираме затоа што целиот персонал нема да штрајкува и ќе ги искористиме сите ресурси тој воспитно образовен дел да не застане, истакна таа.
За денеска е најавена нова рунда разговори на Синдикатот за образование, наука и култура (СОНК) со Владата.
Од СОНК најавуваат дека ако не биде постигнат договор штрајкот најавен за 11 април ќе трае се додека не се исполнат нивните барања.
Членството од регионите на Синдикатот се изјасни за генерален штрајк доколку не се исполнат нивните барања. СОНК бара усогласување на платите во образованието со минималната плата, која од овој месец се зголемува од 15.200 на 18.000 денари и дополнително минималната плата да биде основица со која ќе се множат коефициентите на сложеност на работни места.
СОНК бара корекции на платите и за вработените во градинките, како и усогласување со минималната плата во високото образование и за вработените во ученичките и студентските домови.
Министерката за труд најави дека ќе има нова средба со Здруженијата на родители на деца со попреченост и притоа истакна оти има можност одредени нивни барања да бидат прифатени.
-Работиме, дијалогот со продолжува. Да, најавен е протест на 5 април пред Влада, ќе се сретнам повторно со претставниците на овие здруженија се со цел да им излеземе во пресрет. Има можност одредени нивни барања да бидат прифатени и реализирани во периодот што доаѓа од страна на Министерството за труд и социјална политика, како во делот на правата така и во делот на услугите – зголемување на посебниот додаток на децата со попреченост, ослободување од партиципација и над 26-годишна возраст… Имаат и други барања коишто се дел во ресорот здравство, дел се во МТСП, меѓутоа, најголем дел се реални и прифатливи за Министерството за труд и социјална политика, изјави Тренчевска во одговор на новинарско прашање.
Таа вели дека со социјалната реформа во 2019 година се воспоставени нови права и социјални услуги за лица со попреченост, а и одредени права за родителите што имаат деца со попреченост.
Тренчевска потсети дека минатата недела имала неколку состаноци со здруженијата на родители на деца со попреченост и оти и тогаш разговарале што може Владата и МТСП во наредниот период да направи за да им ги подобри условите и на децата со попреченост, меѓутоа генерално и на сите лица со попреченост, како и на родителите кои што имаат деца со попреченост.
Вложувањето во правилниот раст и развој во децата е влог во нашата иднина, вложување во зајакнување на капацитетите на децата, зајакнување на вештините, поттикнување на нивната љубопитност и желба за знаење од најрана возраст всушност претставува директен придонес кон успешноста на децата во нивниот натамошен живот, порача министерката за труд и социјална политика Јованка Тренчевска по отворањето на детска библиотека во ЈОУДГ Буба Мара – објект Пчелка 1.
Таа додаде дека се радува што ова детско литературно катче или библиотека во овој објект не е само изолиран случај, туку дека во сите објекти на „Буба Мара“ ќе бидат воспоставени такви катчиња.
-Тоа значи дека од најрана возраст децата кои се опфатени во предучилишното образование во оваа јавна установа за претшколско образование ќе можат да се сретнат со сликовници, со книги, да го збогатуваат својот фонд на зборови и со тоа да вложуваме во нивниот раст и развој. Дополнително радува иницијативата и на родителите да донираат сликовници и книги што значи и тие се вклучуваат во идејата на директорката и стручниот тим во градинката за да инвестираме во детскиот развој, истакна министерката.
Таа ја искористи можноста да упати апел и поттик и останатите градинки во државата да ја следат оваа иницијатива и да воспоставуваат такви библиотеки или детски катчиња каде што децата ќе можат од најрана возраст да се сретнат со книги, со сликовници, да читаат бајки, приказни и да се дружат со книгите.
–Читањето во предучилишната возраст е особено значајно затоа што преку читање книги, приказни и бајки децата влегуваат во светот на имагинацијата, го збогатуваат својот фонд на зборови и се стекнуваат со нови поими и изрази…, истакна мнистерката за труд и социјална политика.
Тренчевска најави дека Министерството за труд и социјална политика ќе продолжи и натаму да вложува во реконструкција на постојните и изградба на нови градинки, со цел да се зголеми опфатот на деца во претшколски установи.
Отворањето на библиотеката е во рамки на одбележувањето на Светскиот ден на литература за деца „Спознај го светот преку книгата“.
