Како и секогаш кога се прави листа кој да добие пари од државната каса, ќе се јават и многу незадоволни. Но, како што уште пред една година ни порачаа од Светска банка, државата нема неограничени пари, помошта треба да се намалува и строго да се насочува.
Токму затоа антикризните мерки кои ги предложи и изгласа Владата од страна на економисите беа насочени како умерени и насочени токму на категоријата на ранливите категории на граѓани, но и малите и средни претпријатија полесно да ја пребродат зимата и во наредните четири месеци да се олесни домашниот буџет на граѓаните.
Со претходниот сет мерки што се спроведуваше од првите месеци во годината вкупната вредност на таргетирани мерки до сега достигна над 760 милиони евра, a тоа значи согласно проценките на Светска банка, вкупната помош на Владата досега изнесува околу 5% од БДП.
За споредба, оваа помош во околните земји изнесува 2,5% од БДП на Србија, 2,1% во Косово, 1,4% во Албанија, 0,5% Босна и Херцеговина и 0,1% во Црна Гора.
42.000 граѓани ја чекаат помошта од антикризните мерки
Премиерот Димитар Ковачевски јасно порача дека за некои од мерките планирани за наредните четири месеци мора да се направат законски измени.
Така е за 330.000 пензионери согласно препораките на СБ пензионерите кои, во зависност дали се меѓу оние со најмали пензии или со малку повисоки, треба да добијат месечна помош од 750 до 1.500 денари.
Во директните мерки е еднократната помош по 3.000 денари во наредните четири месеци за ранливите категории граѓани, кои сега примаат различни видови помош од државата, што значи 42.000 граѓани чекаат на гласање за помошта.
Што треба да добијат стопанствениците?
Мерки побараа и стопанствениците, па така компаниите се ослободени од плаќање на ДДВ при увоз на природен гас и електрична енергија, топлинска енергија или енергија за разладување и вкупно се 26 милиони евра остануваат на располагање за оптег во стопанството.
Компаниите што произведуваат храна имаат рок од еден месец да потпишат договор со ЕСМ продажба за набавка на струја по 80 евра за мегават/час.
Оваа мерка на Владата е со ограничено времетраење за да се преброди енергетската криза.
Одлуката стапува на сила по објавување во Службен весник по што компаниите ќе имаат рок од еден месец да потпишат договор. Мерката е со времетраење до 30 април 2023 година или до прекин на прогласената кризна состојба во снабдувањето со електричната енергија.
Исто така продолжува финансирањето на општините за проекти за енергетска ефикасност со 10,5 милиони евра преку Министерството за финансии.
Дополнително се одложува воведувањето еколошката такса, која во стопанството ќе сочува 25 милиони евра.
Субвенции за струјата
Од април до е субвенционирана и пазарната цена на струјата и тоа со 80%, па така 611.000 домаќинства и 72.000 мали потрошувачи и имаат пет пати помала сметка за струја од она што би ја платиле без субвенцијата на државата, а оваа мерка ќе остане до крајот на годината со што планот е да се приклучат и компаниите што произведуваат основни прехранбени производи како масло за јадење, леб и пекарски производи, брашно, млеко и млечни производи, како и компании од месната и живинарската индустрија ќе плаќаат електрична енергија по цена од 80 евра за мегават час“.
Оваа мерка на производителите на основни прехранбени производи ќе им овозможи да имаат предвидливост, стабилна и поевтина струја, што ќе влијае и врз стабилизирање на цените на финалните производи кои се произведуваат и се продаваат.
Со ваква цена на електричната енергија, крајните цени за потрошувачите треба да се намалат за најмалку 10 отсто.
Ги кочи ли опозицијата антикризните мерки?
-Во време на криза, наместо да помогнат – одмагаат, ВМРО-ДПМНЕ кочи законски решенија што обезбедуваат мерки за помош на граѓаните. Преку нивниот претседател на Комисијата за финансирање и буџет, Бојан Стојаноски, ВМРО-ДПМНЕ упорно не закажува седница, на која треба да се расправа за законските решенија што овозможуваат исплаќање финансиска помош за одредени ранливи категории, како пензионери со ниски пензии, приматели на минимална помош и самохрани родители“, рече Даниела Колева, пратеничка на СДСМ, на денешната прес-конференција.
Таа посочи дека „овие категории граѓани треба да добиваат парична помош во следните четири месеци. Оваа помош е дел од последниот пакет мерки вреден над 360 милиони евра за поддршка на граѓаните и компаниите за справување со последиците од кризата“.
– Седницата за финансирање и буџет ќе биде закажана откако Владата ќе ги загледа дополнителните мерки кои ВМРО-ДПМНЕ ги предложи и со кои помошта за граѓаните треба да биде поголема отколку во сетот мерки кои ги предложи власта, вели за ЦИВИЛ Медиа претседателот на комисијата Бојан Стојаноски од редовите на опозициската ВМРО-ДПМНЕ.
Тој додава дека утре или најдоцна во понеделник ќе се донесе одлука кога оваа комисија ќе заседава бидејќи финасиската помош е во интерес на граѓаните.
Владата уште пред две недели по брза постапка го донесе новиот антикризен пакет вреден повеќе од 360,2 милиони евра.
Потребна е совест кај пратениците и под итно да се изгласаат мерки што може да им помогнат на илјадници семејства од ранливите категории, пензионерите но и малите и средни претпријатија.
Соња Танеска
