Општествената одговорност е етички концепт во кој едно лице работи и соработува со други луѓе и организации за доброто на заедницата. Една организација може да демонстрира општествена одговорност на неколку начини, на пример, со донирање, охрабрување на волонтерството, користење на етички процедури за вработување и правење промени кои имаат корист за животната средина.
Општествената одговорност е индивидуална одговорност која вклучува рамнотежа помеѓу економијата и екосистемот во кој се живее и можните компромиси помеѓу економскиот развој и благосостојбата на општеството и животната средина. Општествената одговорност не се однесува само на деловните организации туку и на сите чии постапки влијаат на животната средина.
Ако глобалната одговорност подразбира индивидуални, организациски и институционални должности, обврски и одговорност за дејствување или извршување на начини во согласност со глобално прифатените стандарди и норми на однесување, тогаш општествена одговорност, индивидуалната и корпортивната е меѓу првите чекори за остварување на морални, социјални, економски политички, правни и еколошки одговорности.
Индивидуална општествена одговорност
Индивидуалната општествена одговорност подразбира поединецот да биде активен чинител во унапредување на горе наведените општествени цели. Но, индивидуалната општествена одговорност го има и меѓугенерацискиот аспект, затоа што одредени одговорности кон општеството се преземаат како наследство од претходните генерации, независно дали во дадениот контекст и време се применливи на општествените стандарди и норми.
Корпоративна општествена одговорност
Корпоративната општествената одговорност претставува одговорност на претпријатието за влијанието на одлуките кои ги носат врз општеството и животната средина. Општествено одговорно претпријатие е она кое во процесот на олеснет пристап на пазарот, зголемена продуктивност и намалување на оперативни трошоци, морално и етички се грижи како за своите вработени, така и за заедницата и животната средина на кои директно или индиректно влијаат.
Освен добротворните активности и донации, секое ООП во своето делување би требало да се грижи и да не загадува, да не врши зголемено искористување на природните ресурси, да им обезбеди услови за работа на вработените според пропишаните закони и стандарди, да се грижи за благосостојбата на нивните семејства, да се бори против мобинг, корупција и други форми што можат морално и етички да ги загрозат вработените – односно да бидат и социјално, но и еколошки одговорни.
Подготви: Б. Јордановска
