ЉУБОМИР КОСТОВСКИ
Во несреќата на железничката станица во Нови Сад, до овој момент се избројани 14 мртви, и повеќе од 40 повредени, од кои тројца во критична состојба. Меѓу има и еден државјанин на Северна Македонија, колку што засега е познато.
Како што поминуваат часовите по рушењето на дел од влезната партија во Железничката станица во Нови Сад, на виделина излегуваат некои работи кои можеле да бидат предвидени.
Заради наводното завршување на брзата пруга Белград – Нови Сад, како дел од кинеско-унгарската геостратешка коалиција (се сеќаваме на возот Соко) кредиторот и изведувач зел обврска за реконструкција на објектот каде сега се случи трагедијата. Бидејќи се ближеле изборите во Србија (2012) се брзало (а знаеме колку брзаат Кинезите во градбите) извршена е и првата реконструкција на станицата. Се покажало дека тоа е само шминка, за станицата да изгледа пристојно на отворањето на брзата пруга. Што се вели – за сликање. По свеченоста и сликањето, се отишло на вистинска реконструкција, но не е јасно што се е направено. Денес се тврди дека повеќетонската настрешница не била реконструирана, иако новосаѓани тврдат дека гледале скелиња и на тој сегмент. Впрочем, градежните инженери сега тврдат дека тежината на влезната партија не може да се заобиколи ако се преправа сето друго за што е поврзана!
Кинезите и претходно не сакале да дадат извештај што се е направено и за колку пари и претходно, во изминатите периоди, бидејќи, наводно, требало да се заврши целиот проект брзи пруги (до Суботица односно до Будимпешта). Знаете, да не се мешаат картите, додека нема комплетен договор околу тоа кој и што треба да добие од зделката.
Затоа денес многу работи околу утврдувањето на вината не се на чисто, дури и она – кому ќе му се товари губењето на животите.
А возот Соко час работи, час не работи. Посебно страда од кражби на комуникацискиот материјал. Па се видело дека нема камери што кај вакви пруги се претпоставуваат. Затоа има и чести вандалски напади врз возот и патниците и тоа во брзо возење.
Европска унија, српските аналитичари сега се присетуваат има донесено анализа на кинеските инвестиции. Меѓу другото стои дека Кина посебно ги милува и „финансира“ државите со диктаторски влади. Не треба посебно образложение за ова, нели. И самите гледаме што се случува.
