Западниот Балкан е многу важен за Европската Унија, бидејќи тој географски и припаѓа на Европа и затоа е многу важно да ги унапредиме нашите односи, порача високата претставничка на ЕУ за надворешни работи и безбедносна политика Каја Калас при пристигнувањето на Самитот ЕУ-Западен Балкан во Брисел.
– Денеска потпишавме договор за партнерство во безбедноста и одбраната со Албанија. Таков веќе имаме склучено и со Северна Македонија, така што има многу простор за соработка, рече Калас.
The Western Balkans belong in the European family.
Nurturing this relationship is a personal priority.My doorsteps ahead of the EU-Western Balkans Summit ↓
https://t.co/591GoNaPHJ— Kaja Kallas (@kajakallas) December 18, 2024
Таа посочи дека на Самитот ќе се разговара за повеќе аспекти на соработката со регионот, вклучително и за Планот за раст, нагласувајќи дека Европската комисија и таа лично сакаат да видат напредок во процесот на проширување во следните пет години од нивниот мандат.
Калас додаде дека за време на работната вечера ќе се разговара за руските хибридни активности и за војната во Украина.
– Гледам дека има желба за некакви брзи решенија, но во ваква ситуација кога Русија не сака мир тоа претставува проблем. Со цел да имаме подобри решенија мораме да ја поддржиме Украина колку што можеме повеќе. Колку што таа ќе биде посилна на бојното поле, толку ќе биде посилна и на преговарачката маса, што исто така е во интерес на Европа, додаде Калас.
Таа истакна и дека ЕУ постојано се соочува со закани од страна Русија, со кои таа сака да ја заплаши, но дека единствениот одговор на тоа треба да биде дека Унијата не се плаши.
Во однос на Сирија, Калас нагласи дека ЕУ ќе работи со своите партнери во регионот на Блискиот Исток, како и со Турција и САД со цел случувањата во оваа земја да се одвиваат во саканата насока.
Претходно, Калас на социјалната мрежа Х објави дека се сретнала со премиерот Христијан Мицкоски при што изрази благодарност за поддршка на Украина што и ја пружа земјава и за целосното усогласување со санкциите на Унијата.
Great first meeting with @MickoskiHM.
I am grateful for your support to Ukraine and full alignment with our sanctions.
We want to see North Macedonia making progress on its EU accession and stand ready to support solutions to unblock negotiations. pic.twitter.com/XLhyxDrMNf
— Kaja Kallas (@kajakallas) December 18, 2024
Сакаме да видиме како Северна Македонија напредува во пристапот во ЕУ и да бидеме подготвени да ги поддржиме решенијата за деблокирање на преговорите, напиша Калас на Х.
М. Д.
