Украина го изврши својот најголем напад со беспилотни летала врз руската престолнина во вторникот со најмалку 91 беспилотно летало насочено кон Москва, при што загина најмалку едно лице, и предизвикаа пожари, затворање аеродроми и принудија десетици летови да се пренасочат, соопштија руските власти, објави Ројтерс.
Вкупно 337 украински беспилотни летала биле соборени над Русија, од кои 91 над московскиот регион и 126 над регионот Курск, каде што украинските сили се повлекуваа, соопшти Министерството за одбрана.
Масовниот напад со беспилотни летала во зори се разви токму кога тим од украински официјални лица се подготвуваат да се сретнат со американски тим во Саудиска Арабија за да бараат основа за можни мировни преговори во тригодишната војна, и додека руските сили се обидуваат да опколат илјадници украински војници во западниот руски регион Курск.
Како што се одвиваше нападот, градоначалникот на Москва, Сергеј Собјанин, рече дека воздушната одбрана сè уште ги одбива нападите врз градот, кој заедно со околниот регион има население од најмалку 21 милион жители и е една од најголемите метрополи во Европа.
Д. Мишев
