Илјадници граѓани на Унгарија синоќа излегоа на улиците на Будимпешта, протестирајќи против новиот закон кој има за цел да ја забрани годишната ЛГБТ парада.
Критичарите на законот го гледаат како дел од поширока кампања за ограничување на демократските слободи, во пресрет на парламентарните избори во 2026 година.
Премиерот Виктор Орбан, кој веќе долго е во судир со либералните кругови во ЕУ, ја засили реториката против ЛГБТ заедницата, а истовремено најави мерки за ограничување на странското финансирање на независните медиуми и невладините организации.
Во март, парламентот, каде што доминира партијата на Орбан – „Фидес“, усвои закон со кој се забранува одржување на ЛГБТ парадата, со образложение дека „може да им наштети на децата“.
Според законот, полицијата добива овластување да користи камери за препознавање лица за идентификација на учесниците, како и да изрекува казни, што критичарите го нарекуваат инструмент за политичка репресија.
Орбан тврди дека самото одржување на протестите покажува дека во Унгарија „нема закана за демократијата“ и ги отфрли демонстрациите како „чиста провокација“.
Сепак, протестот, трет по ред против контроверзните реформи на Орбан, е доказ за растечката загриженост за состојбата со демократските права во земјата, повеќе од две децении по нејзиното приклучување кон Европската Унија, наведуваат локални медиуми.
Дваесет и две амбасади во Будимпешта, вклучувајќи ги француската, германската и британската, објавија заедничка изјава во која изразуваат „длабока загриженост“ поради новите ограничувања на правото на мирно собирање и слобода на изразување.
Организаторите на ЛГБТ парадата најавија дека ќе го одржат настанот и покрај законската забрана, пренесе МИА.
