Поранешниот француски претседател Никола Саркози ќе биде ослободен од затвор откако судија пресуди дека може да го отслужи остатокот од казната дома, објави Гардијан.
Саркози му рече на судот дека неговите три недели во затвор биле „исцрпувачки“ и „кошмар“ додека се појавуваше преку видео врска од затворот.
Саркози влезе во парискиот затвор Ла Санте на 21 октомври, откако парискиот суд му изрече петгодишна казна за криминален заговор околу шема за добивање средства за изборна кампања за неговата претседателска трка во 2007 година од режимот на покојниот либиски диктатор Моамер Гадафи.
Тој негира дека сторил нешто лошо и поднесе жалба против таа пресуда, а ново судење по жалба е закажано за следната пролет. Судиите минатиот месец пресудија дека поради „исклучителната сериозност“ на неговата пресуда, тој мора да оди во затвор додека трае жалбената постапка.
Според Гардијан, Апелациониот суд во Париз во понеделник го одобри барањето на Саркози за ослободување за да ја отслужи казната дома со строга судска контрола. Според условите за неговото ослободување, на Саркози ќе му биде забрането да разговара со службеници од Министерството за правда. Исто така, ќе му биде забрането да разговара со други вклучени во случајот, а ќе му биде забрането да ја напушти Франција.
На сослушувањето во понеделник, Саркози, облечен во темно сино одело, се појави пред камера од затворот, седејќи на маса со своите адвокати покрај него. Тој му рече на судот: „Сакам да им оддадам почит на сите вработени во затворот, кои се исклучително хумани и кои го направија овој кошмар поднослив – затоа што е кошмар.“
Тој рече: „Никогаш немав никаква идеја или намера да побарам од г-дин Гадафи каков било вид финансирање… Никогаш нема да признаам нешто што не сум го направил… Никогаш не замислував дека на 70 години ќе бидам во затвор. Тоа е тешко искушение што ми е наметнато. Признавам дека е тешко, многу е тешко. Остава трага на секој затвореник затоа што е исцрпувачко.“
Саркози е држен во самица за негова сопствена безбедност, во индивидуална ќелија од околу 9 квадратни метри со сопствен туш и тоалет. Двајца телохранители ја окупираат соседната ќелија за да ја обезбедат неговата безбедност. Францускиот неделник „Ле Поан“ објави дека тој јадел само јогурти во затворот бидејќи се плашел дека можеби ќе му плукнат врз храната. Тој имал можности да готви сам, но одбил да го стори тоа, објави списанието, повикувајќи се на неименувани извори.
На профилот на Саркози на социјалните мрежи минатата недела беше објавено видео од купишта писма, разгледници и пакети за кои се вели дека му биле испратени, а некои од нив вклучувале колаж, чоколадо или книга. „Ниедно писмо нема да остане неодговорено“, објави неговиот профил. „Крајот на приказната сè уште не е напишан“.
Саркози, кој беше десничарски претседател на Франција помеѓу 2007 и 2012 година, е првиот поранешен шеф на земја од ЕУ што отслужил затворска казна и првиот француски повоен лидер што завршил зад решетки.
Д. Т.
