Русија пресретна 19 беспилотни летала што се движеа кон Москва во текот на ноќта на 5-ти и 6-ти мај, изјави градоначалникот на Москва, Сергеј Собјанин, на 6 мај.
Како што пренесува Кијив Индипендент, ова е втора ноќ по ред во која беспилотни летала наводно ја таргетирале престолнината на Русија. Нападите се случуваат само неколку дена пред парадата за Денот на победата во градот и предложеното привремено прекинување на огнот од страна на Русија, закажано за 7-ми до 9-ти мај.
Украинската влада не коментираше за наводниот напад со беспилотни летала. Кијив Индепендент не можеше независно да ги потврди тврдењата на Русија во времето на објавувањето.
Единиците за воздушна одбрана пресретнаа 19 беспилотни летала што летаа кон Москва од различни насоки, тврди Собјанин. Отпадоци од едно од беспилотните летала наводно паднале на автопатот Каширское, главен московски пат, а службите за итни случаи работат на местото на настанот. Не се пријавени жртви.
Заканата со беспилотни летала предизвика привремени затворања на аеродромите Внуково, Домодедово, Жуковски и Шереметјево во регионот. Покрај сите четири московски аеродроми, ограничувања беа воведени и на аеродромот Грабцево во руската Калушка област.
Пријавениот напад се случува истата недела кога во Русија се прославува Денот на победата на 9 мај, со кој се одбележува улогата на Советскиот Сојуз во победата над нацистичка Германија во Втората светска војна. Кремљ покани странски гости да присуствуваат на парадата на Денот на победата во Москва, иако многу западни претставници одбија.
Рускиот претседател Владимир Путин, исто така, еднострано прогласи „хуманитарно примирје“ од полноќ на 8 мај до полноќ на 11 мај. Претседателот Володимир Зеленски го отфрли предлогот како „театарска претстава“, обвинувајќи го Путин за манипулирање со меѓународната заедница со прогласување кратки прекини на огнот кои нема намера да ги почитува.
Украина се согласи на прекин на огнот предложен од САД за сите непријателства во траење од 30 дена, но Русија продолжува да одбива.
Додека Зеленски и другите светски лидери остануваат скептични кон тридневното примирје на Путин, американскиот претседател Доналд Трамп на 5 мај го пофали гестот, велејќи дека краткото примирје „не звучи многу, но е многу, ако знаете од каде почнавме“.
Зеленски на 3 мај предупреди дека Русија може да организира провокации, како што се „палења, експлозии или други дејствија“, околу празникот на Денот на победата и да се обиде да ја обвини Украина.
Д. Мишев
