Високиот претставник во Босна и Херцеговина, Кристијан Шмит, во Сараево изјави дека членовите на Управниот комитет на Советот за спроведување на мирот во БиХ на состанокот изјавиле дека претседателот на Република Српска Милорад Додик „ја преминал црвената линија“ и со тоа се исклучил од дискусијата за решавање на политичката криза во БиХ.
„Додик ја премина црвената линија и поради таа причина тој повеќе не е личност која може да дискутира за донесување конструктивни политички одлуки“, рече Шмит на прес-конференција по дводневната седница на Управниот одбор на ПИК.
Тој рече дека БиХ е суверена држава и дека нејзините ентитети постојат само во рамките на државата.
„Дејтонскиот договор потврдува дека БиХ постои како независна држава и дека нејзината административна структура е изменета така што се состои од два ентитета“, рече високиот претставник.
Тој додаде дека членовите на ПИК ги осудуваат постапките на властите на РС, кои ја доведуваат во прашање уставната рамка на БиХ.
Шмит рече дека, ако претходно имало пренос на надлежности од ентитет на државно ниво, тоа значи дека овие надлежности остануваат на државно ниво.
„Надлежностите остануваат на државно ниво и државата треба да одлучи дали да ги врати на ентитетите, а тоа може да се случи само со гласање на државно ниво (во парламентот на БиХ)“, рече Шмит.
Тој оцени дека потезите на властите на РС „не им служат на граѓаните, особено на оние во РС“, додавајќи дека политичките партии, вклучувајќи ги и опозициските партии од РС, кои вчера одржаа состанок со амбасадорите на ПИК, се согласиле дека прашањето за санкциите не е насочено против граѓаните на Република Српска.
