Претседателот на Мадагаскар, Андри Раџоелина, назначи генерал на армијата за нов премиер во обид да ги прекине протестите предводени од младите против неговото владеење.
Тој рече дека на нацијата ѝ е потребен премиер „способен да го врати редот и довербата на народот“ пред да го именува генералот Руфин Фортунат Зафисамбо на функцијата.
Додека претседателот изрази страв од обид за државен удар, назначувањето на генералот означува значајна милитаризација на владата и се чини дека е обид на Раџоелина да ја обезбеди поддршката на армијата во време на зголемени тензии.
Протестното движење, познато како Генерацијата Z Мада, го отфрли назначувањето на генералот Зафисамбо и му даде на Раџоелина 48 часа да поднесе оставка.
„Додека Раџоелина е на власт, ние ќе ја продолжиме борбата“, се вели во соопштението на Генерацијата Z Мада.
Протестите започнаа на 25 септември, предизвикани од јавниот гнев поради постојаните прекини на водата и електричната енергија, а оттогаш се претворија во пошироко незадоволство поради корупцијата, високата невработеност и кризата со трошоците за живот.
Минатата недела, Раџоелина го разреши премиерот Кристијан Нтсај, цивил, и целиот негов кабинет во обид да ги смири демонстрантите.
Д. Мишев
