САД постигнаа билатерални договори за депортација со Хондурас и Уганда како дел од нивната борба против нелегалната имиграција, според документите добиени од Си-Би-Ес, американскиот партнер на Би-Би-Си.
Уганда се согласи да прифати нејасен број африкански и азиски мигранти кои побарале азил на границата меѓу САД и Мексико, а Хондурас ќе прими неколку стотици депортирани лица од земјите што зборуваат шпански јазик, соопшти Си-Би-Ес.
Овој потег е дел од обидот на администрацијата на Доналд Трамп да натера повеќе земји да прифатат депортирани мигранти кои не се нивни државјани.
Активистите за човекови права ја осудија политиката, велејќи дека мигрантите се соочуваат со ризик да бидат испратени во земји каде што би можеле да бидат повредени.
Според договорот, Уганда се согласи да прифаќа депортирани мигранти сè додека немаат криминално досие, но не е јасно колкумина земјата на крајот би примила, објави Си-Би-Ес.
Хондурас се согласи да прима мигранти во текот на две години, вклучувајќи семејства што патуваат со деца, но документите сугерираат дека би можела да одлучи да прифати повеќе.
И двата договори се дел од поширокиот притисок на администрацијата на Трамп за договори за депортација со земји на неколку континенти – вклучувајќи ги и оние со контроверзни евиденции за човекови права.
Досега, најмалку десетина земји се согласија да прифатат депортирани мигранти од други земји.
Д. Мишев
