Пишува: Амб. ЛАРИСА ДИР
Вонредна и Ополномоштена Амбасадорка на Украина во Република Северна Македонија
Во текот на четири години од руската војна, државата-агресор РФ примени против Украина илјадници и илјадници ракети, дронови и авијациски бомби, упатуваше закани со нуклеарна опасност и користеше тортура, глад, терор и студ како оружје.
Поради масовните напади на РФ, во енергетскиот систем на Украина во моментов е воведен режим на вонредна состојба. Низ целата земја се применуваат итни исклучувања на електричната енергија, а состојбата останува исклучително сложена. Како резултат на постојаните цинични гранатирања од страна на руската армија, жителите на прифронтовите и граничните региони остануваат долгорочно без електрична енергија. Континуираните борбени дејства значително го отежнуваат брзото и ефикасно обновување на снабдувањето со електрична енергија во овие региони. РФ намерно продолжува интензивно да ги напаѓа токму овие подрачја.
Практично без електрична енергија се и потрошувачите во Харкивската и Донецката област поради постојаните ноќни руски напади, иако итните поправки и обновувачките работи не запираат ниту за еден час. Исклучително тешка е состојбата и во Кијив и Кијивската област.
Критичната инфраструктура, електроснабдувањето, греењето и водоснабдувањето беа изложени на брутални напади со крстосувачки и балистички ракети, како и со дронови. РФ ги користи временските услови – наглото заладување – со цел да нанесе што поголема штета врз енергетските објекти на Украина. Таа води војна против цивилното население, обидувајќи се да ја претвори зимата во оружје. Русија свесно создава услови за живот кои можат да доведат до физичко уништување на украинскиот народ, што спаѓа под дефиницијата на член II (с) од Конвенцијата за геноцид.
Во услови на отсуство на греење во домовите, луѓето немаат можност да подготвуваат храна. Распоредени се стотици пунктови на отпорност и мобилни кујни, каде што граѓаните можат да добијат оброци и неопходна поддршка.
Луѓето кои речиси деноноќно работат во услови на силен студ – спасувачите, техничарите, енергетичарите – заслужуваат посебна поддршка и благодарност.
Постојаните руски напади го нарушуваат снабдувањето со електрична енергија. РФ применува двоен терор – ракетен терор и терор со студ. Дополнително, РФ се обидува да ги напаѓа трафостаниците што ги поврзуваат нуклеарните електрани со електроенергетската мрежа, со цел да предизвика исклучување на нуклеарното производство.
Очигледно е дека кремљ свесно нанесува масовни ракетни и беспилотни удари врз критичната инфраструктура на Украина, оставајќи стотици илјади луѓе без електрична енергија, греење и водоснабдување, користејќи ги суровите зимски студови.
