Федералната порота во Оукленд, Калифорнија, едногласно ја отфрли тужбата на Илон Маск против OpenAI и извршниот директор Сем Алтман, оценувајќи дека милијардерот предоцна ги поднел своите барања пред судот. Одлуката претставува голема правна и деловна победа за OpenAI во момент кога компанијата се подготвува за потенцијална иницијална јавна понуда (IPO) која би можела да биде една од најголемите во историјата на технолошкиот сектор.
Случајот се водеше пред федералниот суд во Северна Калифорнија, а поротата заклучи дека Маск знаел или морал да знае за трансформацијата на OpenAI од непрофитна во профитно ориентирана структура уште пред неколку години. Според судските документи, клучен аргумент бил фактот што Маск уште во 2020 година јавно ја критикувал компанијата дека е „заробена од Microsoft“, што според одбраната покажувало дека бил свесен за насоката во која се движи OpenAI.
Конфликтот меѓу Маск и раководството на OpenAI има длабоки корени. Маск беше еден од коосновачите на компанијата во 2015 година и инвестираше околу 38 милиони долари во нејзините рани фази. Неговата позиција беше дека OpenAI требало да остане организација која развива вештачка интелигенција во корист на човештвото, а не профитна корпорација блиско поврзана со големи инвеститори.
Од друга страна, адвокатите на OpenAI тврдеа дека Маск уште во 2017 година поддржувал идеја за профитна структура и дури сакал поголема контрола врз компанијата. Судењето откри бројни приватни пораки, електронска пошта и сведоштва од водечки фигури во индустријата, вклучувајќи го и директорот на Microsoft.
Пресудата има огромно финансиско значење за OpenAI. Компанијата, која стои зад ChatGPT, веќе се смета за еден од највредните технолошки играчи во светот. Според повеќе американски медиуми, OpenAI би можел да достигне вредност блиску до еден трилион долари доколку излезе на берза во наредниот период.
Во процесот, Маск бараше отштета од околу 150 милијарди долари и промени во структурата на компанијата, вклучително и враќање на OpenAI кон непрофитниот модел. Судот, сепак, никогаш не навлезе во суштината на тие обвинувања, бидејќи случајот беше отфрлен поради застареност.
Со ова се намалува и правниот ризик за Microsoft, кој инвестираше околу 13 милијарди долари во партнерството со OpenAI и претставува клучен технолошки и инфраструктурен партнер на компанијата.
По пресудата, Маск порача дека случајот бил отфрлен поради „техничка календарска процедура“, а не поради суштината на неговите аргументи. Тој најави жалба и оцени дека одлуката создава опасен преседан за непрофитните организации и технолошките компании.
Во меѓувреме, Маск продолжува агресивно да го развива својот AI-стартап xAI и четботот Grok, во обид да конкурира на OpenAI, Google и другите водечки компании во трката за доминација во вештачката интелигенција.
ЦИВИЛ Медиа Деск
