Косовскиот премиер Албин Курти побара од новото политичко раководство на Србија да ја признае независноста на Косово, да ја прекине кампањата против неговото меѓународно признавање и да го предаде Милан Радоичиќ, кого го посочи како главен организатор на вооружениот напад во Бањска во септември 2023 година.
Барањата Курти ги упати на 9 ноември, за време на обраќањето и разговорот со студентите на Париската школа за меѓународни односи (PSIA). Говорот беше објавен на официјалната веб-страница на Владата на Косово на 10 ноември.
„Процесот на нормализација мора да вклучува одговорност за терористичкиот напад во Бањска, почнувајќи со предавањето на Милан Радоичиќ, неговиот главен организатор, за да се соочи со правдата“, порача Курти.
Тој оцени дека новото политичко раководство во Белград треба да ја прифати, како што рече, реалноста на 21 век – дека Косово е независна држава, признаена од повеќе од 120 земји.
„Србија мора да ја прекине својата агресивна кампања против нашето меѓународно признавање, вклучително и инструментализирањето на руското противење на нашето членство во меѓународните организации“, изјави Курти.
Косовскиот премиер ги повика и петте земји членки на Европската Унија и четирите членки на НАТО што сè уште не ја признале независноста на Косово да го преиспитаат својот став. Во тој контекст, тој посочи дека околностите во кои настанала косовската држава, вклучувајќи ги репресијата, етничкото чистење и злосторствата врз албанското население, не треба да се изедначуваат со други сепаратистички движења.
Поддршка од Франција за европската и евроатлантската интеграција
За време на посетата на Париз, Курти се сретна и со претседателот на францускиот Сенат, Жерар Ларше. На средбата побара поддршка од Франција за напредокот на Косово кон ЕУ и за неговите евроатлантски аспирации, вклучително и членството во НАТО.
Курти нагласи дека Косово е целосно усогласено со Заедничката надворешна и безбедносна политика на ЕУ и оцени дека доделувањето кандидатски статус и отворањето пристапни преговори би биле поттик за понатамошен напредок на земјата.
Изборната победа во Србија и прашањето за Косово
Пораките на Курти доаѓаат по предвремените парламентарни избори во Србија на 25 октомври, на кои победи Студентската листа „Студентите победуваат“.
Конститутивната седница на новото Собрание е закажана за 17 ноември. Новата влада сè уште не е формирана, а по конституирањето на парламентот треба да следи постапката за нејзино формирање.
Прашањето за статусот на Косово останува едно од клучните отворени прашања во односите меѓу Белград и Приштина, но и во поширокиот процес на европска интеграција на Западен Балкан.
Б. Ј.
ЦИВИЛ МЕДИА
ПОДДРШКА ЗА ЦИВИЛ. ДОНИРАЈТЕ ДЕНЕСКА.
Ако го цените тоа што го прави ЦИВИЛ, поддржете ја нашата работа.
Вашата поддршка ни овозможува да известуваме, да ја одржуваме платформата за демократски дијалог, да објавуваме едукативни содржини, да се бориме против лагите и да ги браниме човековите права и слободата.
Поддржете го ЦИВИЛ. Донирајте ДЕНЕСКА.
