Регулаторната комисија за енергетика (РКЕ) донесе одлука за намалување на малопродажните цени на нафтените деривати во просек за 7,51 проценти во однос на цените утврдени на 2 ноември. Новите цени стапуваат во сила на полноќ, односно од 10 ноември.
Според одлуката на РКЕ, најголемо поевтинување има кај бензините, кои ќе бидат поевтини за седум денари по литар. Дизелот поевтинува за 5,5 денари, а екстра лесното масло за домаќинство за 6,5 денари по литар.
Од полноќ, малопродажните цени на нафтените деривати ќе изнесуваат:
- Еуросупер БС-95: 86 денари за литар, намалување за 7 денари.
- Еуросупер БС-98: 88 денари за литар, намалување за 7 денари.
- Еуродизел БС: 94,5 денари за литар, намалување за 5,5 денари.
- Екстра лесно масло за домаќинство: 103,5 денари за литар, намалување за 6,5 денари.
- Мазут: 49,31 денар за килограм, намалување за 6,26 денари.
Во образложението на промената на цените се вклучени движењата на берзанските цени на нафтените деривати, понискиот курс на доларот и владините мерки за намалување на акцизите.
Акцизата за бензините е намалена за два денара по литар, додека за дизелот намалувањето изнесува четири денари. Дополнително, за дизелот се применува намалена стапка на ДДВ од 10 проценти.
ЦМ Деск
