Од четврта најбрзорастечка економија во Европа до предупредување за банкрот поради предвремени избори – претседателот на СДА Македонија, Џелал Хоџиќ, со четири изјави на премиерот Христијан Мицкоски ја разоткрива противречноста во неговата реторика.
„Како пукна економскиот популистички балон на премиерот Христијан Мицкоски… Четврта по раст економија во Европа ќе банкротира ако има предвремени избори.“
Со оваа иронична забелешка, Џелал Хоџиќ, во објава на Фејсбук, потсетува на четири изјави на премиерот Христијан Мицкоски, дадени во периодот од јуни 2025 до ноември 2026 година.
На 3 јуни 2025 година, Мицкоски тврдеше дека македонската економија е четврта во Европа според растот, веднаш зад Ирска, Данска и Полска.
На 13 март 2026 година, премиерот отиде чекор понатаму:
„Ако годината продолжи вака, можеби ќе се најдеме дури и во првите три економии.“
Само еден месец подоцна, на 17 април, изјави дека земјата има „три и пол пати поголем раст од просечниот во ЕУ шест квартали по ред“.
Но, на 11 ноември 2026 година, реториката доби сосема поинаков тон:
„Шест месеци техничка влада ќе ја однесе државата директно во банкрот.“
Премиерот го образложи предупредувањето со потребата во следните две години да се обезбедат пет милијарди евра за финансиските обврски на државата.
Економскиот раст и проблемите со задолжувањето не се меѓусебно исклучиви. Сепак, контрастот меѓу триумфалните пораки за економските успеси и драматичните предупредувања за банкрот отвора сериозно прашање за доследноста и веродостојноста на владината комуникација.
Објавата на Хоџиќ ја сведува оваа противречност на едно едноставно прашање: Како економијата што до вчера беше претставувана како европски шампион одеднаш стана толку ранлива што би можела да банкротира поради предвремени избори?
ЦИВИЛ МЕДИА
