Селото Раштак во Општина Гази Баба речиси 20 дена е без вода! Жителите се гневни, незадоволни од односот на локалната власт, која тврдат е инертна кон проблемот, што се повторува со години.
„Општината ништо не направи да им помогне на граѓаните во овие три недели. А, проблемот со водата не е само од оваа година. Не ни е јасно, зошто не се решава. Во близина има извори, може да се најде решение, но човечки фактор е сигурно проблемот. Општината само дава ветувања пред избори и ништо не е средено“, реагираа за ЦИВИЛ Медиа похрабрите жители на Раштак.
Тие тврдат дека нема изразена граѓанска реакција, затоа што на многумина им е ветено вработување, а другите молчат од страв, да не го изгубат работното место.
По овие реакции на граѓаните, побаравме одговор од Општина Гази Баба, кога и како ќе се реши проблемот.
„Во Раштак се носи вода со цистерни, по двапати во текот на денот, за да се задоволат потребите на жителите од ова населено место. Жителите се без вода, од причина што во моментов има посериозен дефект на филтер станицата за прочистување на водата. Делот е порачан од производител од Израел (само таму го изработувале), а според ветувањата ќе стигне во Македонија за 15 дена, па ќе биде вграден“, изјави Емилија Кипровска од Општина Гази Баба.
М. Талеска
