По пријава од граѓанин, ЦИВИЛ регистира запишани гласачи во избирачкиот список на адресата на Веро супермаркет во општина Аеродром.
Иако станува збор за деловна зграда, каде се наоѓа супермаркетот, над кој свои деловни простории имаат уште неколку приватни лица, на истата адреса има регистирани гласачи, и тоа со станови со двоцифрени бројки.
Покрај оваа пријава, до ЦИВИЛ сè уште стигнуваат многубројни пријави од граѓанки и граѓани кои имаат проблеми со фантомски гласачи.
Една граѓанка, исто така од општина Аеродром, повеќе од година, на својата адреса има тројца фантомски гласачи.
„Проверив во избирачкиот список и овие луѓе повторно се на моја адреса. Овие луѓе се веќе цела година и повеќе на оваа адреса, Ве молам, ама навистина Ве молам да се тргнат од оваа адреса. Дојдоа од ДИК и направија записник, пријавено е во општина Аеродром, дадов и print screen и никој ама баш никој не се потруди ова да го среди. Не ми е јасно што уште треба да се направи за да се тргнат овие фантоми од оваа адреса бидејќи НЕ ПОСТОЈАТ. Се надевам дека конечно некој ќе превземе нешто“, стои во пријавата од оваа граѓанка.
Ја повикуваме Државната изборна комисија, како и општинските изборни комисии, да постапуваат по пријавите на граѓанките и граѓаните, имајќи предвид дека до ЦИВИЛ стигнуваат голем број претставки од граѓани кои веќе пријавиле недоследности на избирачкиот список, но по овие пријави сè уште не се преземени конкретни чекори.
ЦИВИЛ – Центар за слобода ги повикува граѓанките и граѓаните да помогнат во ревизијата на Избирачкиот список и да пријавуваат нерегуларности. Тие можат да извршат јавен увид во Избирачкиот список до 9 септември на полноќ.
И покрај оценката на ДИК дека увидот во Избирачкиот список на граѓанките и граѓаните е задоволителен, ЦИВИЛ апелира до сите граѓанки и граѓани со право на глас, час поскоро да се проверат и да пријават нерегуларности, односно доколку има потреба да се изврши дополнување, бришење или запишување во Избирачкиот список.
Маја Ивановска
