Сојузот на синдикати на Македонија (ССМ) бара минималната плата од 12.000 денари согласно со измените на Законот од пред еден месец, да не биде условена од учинокот. Новата регулатива, според која 20 отсто од работниците може и законски да не добиваат минимална плата, сметаат од ССМ ги загрозува вработените во одредени дејности.
„ССМ поднесе претставка до Уставен суд за испитување на уставноста на членот на Законот, којшто го предвидува нормираниот учинок, бидејќи Уставот на Македонија гарантира еднаквост на граѓаните, заработувачка согласно со вложениот труд. А, во Законот е вградена одредба која што кажува дека 20 отсто од работниците може да не ја добиваат минималната плата. Поради тоа, ние цело време укажуваме дека или Законот има цел да одреди минимална плата гарантирана за полно работно време или зошто ни е закон што вели „вие не мора да ја платите таа плата“, вели Маре Анчевска, генерален секретар на Синдикатот за индустрија, енергетика и рударство (СИЕР).
Според оценките на синдикалците во сите дејности има услови за исплата на минималецот од 12.000 денари. Не држат забелешките на одредени работодавци, дека затоа што работат лон-систем за странски пратнери по веќе договорени суми, не може да ја зголемат платата на работниците.
„Работодавците со следните транши на договори што ќе ги склучуваат, знаат со какви трошоци треба да калкулираат.Точно е во јавноста се шират гласини дека не може да се оствари, дека не е реална и не е остварлива минималната плата. Меѓутоа исто така во јавноста протекоа и други информации од спротивната страна, за тоа колкави лични примања пријавуваат одредени сопственици на текстилни фабрики, што тврдат дека не може да ја постигнат оваа минимална плата. Да, минималната плата е економска категорија, таа треба да биде резултат на остварување економски резултат и треба да се гледа целокупната економија на претпријатието. Но, мора да почнат првите чекори кон чесно вреднување на трудот“, забележува Анчевска.
За поголема продуктивност според Анчевска работодавците треба да се насочат кон нови вложувања, следење на техничко-технолошкиот развој. Не смее целиот товар да се биде врз работниците, кои и колку да работат и какви било вештини да поседуваат, не ќе можат да ги постигнат резултатите коишто би се постигнале со модернизација на производната линија во конкретната дејност.
М. Талеска
