Група маскирани лица, облечени во црни кошули, ги нападнале луѓето кои на 25 ноември дојдоа да положат цвеќе на партизанските гробишта во Мостар, по повод денот на државноста на Босна и Херцеговина. Оваа информација ја потврди и Луис Мариќ, портпаролот на полицијата на кантонот.
Како што открива полицијата подоцна во текот на денот, се работело за група екстремисти, инаку навивачи на фудбалскиот клуб Зрињски. По инцидентот со претставниците на сојузот на борците од НОБ, истата група нападнала и група студенти од Хрватска, Србија и Босна и Херцеговина, кои, исто така, биле во обиколка на партизанските гробишта.
Според информациите од хрватскиот портал Лупига, студентите и немале намера да оддаваат почит на гробишта каде што се закопани партизани. Едноставно, биле во туристичка обиколка на градот, кога нивниот водич им предложил да погледнат една некогашна знаменитост на Мостар, која денес претставува срам за овој град.
Пратеникот во Собранието на Херцеговско-неретванскиот кантон, Амер Загорчиќ изјави: „Во Мостар ништо ново. Фашизмот е жител на овој град веќе четвртина век. Овие не се нелегални и непознати организации. Тие не се кријат, јавно и без стеснување демонстрираат сила и своите ставовите. А зошто го прават тоа? Го прават тоа затоа што им се може, бидејќи власта ги толерира…“
извор: Lupiga
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
