Најголем број од граѓаните или 33,8 проценти со оценката добар три ја оцениле состојбата во јавното здравство во Македонија, покажува истражувањето на перцепциите на граѓаните за јавното здравство, спроведено од М-проспект за Македонски центар за меѓународна соработка и телевизија Телма.
На прашањето „Како би ја оцениле состојбата со јавното здравство во Македонија?“ најниска оценка (еден) дале 18 проценти од испитаниците, со два 14,6 отсто, со четири 16,3 и со пет 15,8 проценти од анкетираните.
Според истражувањето над 60 проценти од граѓаните ја користеле услугата „Мој термин“ во последните 12 месеци.
Најголем број од испитаниците или 19,2 отсто рекле дека успеале термин за преглед да закажат за помалку од три дена, додека на другата крајност само 2,4 проценти рекле дека терминот го закажале „за повеќе од шест месеци“. Речиси половината од испитаниците, односно 49,1 процент закажаниот термин бил навремен, додека за 22,5 отсто бил задоцнет.
Истражувањето покажува дека покрај високите оценки за услугата „Мој термин“, вкупно 68,2 проценти од испитаниците цо целост или до некаде се согласуваат со изјавата дека не може да се закаже преглед кај специјалист доколку нема познат, односно врски во јавното здравство.
Мнозинство од граѓаните или 67,4 проценти, сепак, сметаат дека приватниот здравствен сектор нуди поквалитетни услуги и повисока професионалност, иако, според речиси 62 отсто од испитаниците, тој е недостапен поради високите цени. Големо мнозинство, односно 91 процент од испитаниците сметаат дека здравственото осигурување треба да покрива и услуги од приватното здравство.
Што се однесува до достапноста на лековите од позитивната листа, 57,7 проценти од испитаниците сметаат дека тие лекови постојано се достапни.
Најголем број од граѓаните или 38,6 отсто сметаат дека јавното здравство малку се грижи за лицата со ретки болести, додека мнозинството сметаат дека лицата со хендикеп не се третираат соодветно во јавното здравство и дека јавните здравствени установи во Македонија не се прилагодени за лица со хендикеп. Ова се однесува и на јавните здравствени услуги кои, смета мнозинството, не се прилагодени за лицата со хендикеп.
Анкетата е телефонска и била спроведена во периодот од 11 до 18 декември 2017 година врз репрезентативен примерок од 1.000 испитаници.
Истражувањето е дел од проектот „Топ тема на ваша страна“, поддржано од УСАИД.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.